Un caso lamentabel pero na mes momento preocupante a tuma luga diabierna marduga na momento cu habitante a tuma nota cu a caba di joyride su auto. Esaki a pasa den fraccion di minuut. E tabata den cushina y manera custumber a rek cabes pa tira bista riba su auto pafo si tur cos ta bon y pa su sorpresa e auto no tabata t’ey.
Esaki tabata den careda di 12:25 am na su cas na Sabana Liber. E propietario di un Kia Rio a sali mesora pa verifica si en berdad su auto ta para pafo ainda of no. Unico cos cu el a bin topa cu ne ta e glas di e bentana kibra cu a laga atras caminda e auto tabata staciona.
No a basila y a tuma contacto cu autoridad mesora. Aki nan a avis’e pa presenta na warda di polis pa entrega keho mas lihe posibel. Direccion warda di polis na Shaba, pa su asombro, e ta tuma nota di su vehiculo riba caminda direccion noord. Vehiculo cu nan a caba di horta algun rato atras.
A cuminsa un persecucion eynan mes. E propietario di e Kia Rio no a pensa dos biaha y a bay tras di su auto, el a cuminsa basha nan cu pita pa nan para. A tuma nota di dos hoben den e vehiculo, pero mientrastanto e persecucion ta sigui y a drenta Montaña nan tras.
Nan a plama den palo di luz!
E hoben tras di stuur no por a controla e vehiculo, den su ansha pa perde e doño di e vehiculo nan tras, a slip y bay pega den un palo di luz. Nan a sali na careda for di e vehiculo, lagando e destruccion atras.
Polis a bin topa cu e vehiculo destrui y e doño indigna cu tur locual cu a caba di pasa. A duna declaracion pa polis mientras a pone tur otro colega riba alerta. No a tarda mucho cu den area di Paraguana a indica cu lo a mira un persona sospechoso canando den e vecindario y cu ta cuadra cu e descripcion duna.
No por confirma si ta trata di un di e culpabelnan di e acto aki, pero polis a detene na sitio pendiente mas investigacion. Departamento forensico tambe a presenta pa tuma fingerprint y demas dato. A confisca e vehiculo y transport’e cu takelwagen relaciona cu e investigacion.
