Manera por a tuma nota, algun dia pasa e sindicatonan hunto cu nan miembronan a expresa cu e accionnan cu ta tumando luga den e ultimo simannan lo continua awe mainta. Ta trata aki di manifestacion y protesta den union di parti di e trahadonan cu ta exigiendo nan 12.6% di salario bek.
Den un reunion cu a tuma luga dialuna ultimo, Prome Minister Evelyn Wever-Croes lo a pidi nan un termino di dos dia pa e por bay negosha cu Hulanda. Sinembargo, ayera a bin haya tende cu prome minister a bolbe pidi un extension te ora cu gobierno di Hulanda tuma su decision den Rijksministerraad. Y ta esaki ta netamente locual a conduci na mas accion.
Segun Jeromin Kelly, presidente di STT, a expresa, e ta considera e acto aki un falta di respet. Asina el a splica cu ora nan a sinta cu minister presidente y cu el a pidi nan e termino di dos biaha binticuater ora, e tabata sa caba cu e no lo por bay tin un contesta pa nan. Pues segun Kelly, e lo tabata mas etico si minister presidente lo tabata honesto y djis bisa nan pa warda Rijksministerraad. Esaki lo a pone cu nan lo a tuma e decision aki un poco mas suave y e ambiente lo tabata mas trankil.
Pa cobertura mas amplio lesa edicion di TREMPAN mañan.
