Durante e reunion publico di Parlamento tocante e situacion na Korrektie Instituut Aruba (KIA), Parlamentario Jennifer Arends-Reyes a enfatisa cu e instituto mester di un vision serio, responsabel y structural. Segun Arends-Reyes, KIA ta un institucion esencial den nos sistema di husticia, caminda siguridad, dignidad humano, condicionnan di trabou y rehabilitacion mester forma un solo conhunto.
Arends-Reyes a splica cu e meta di e reunion tabata pa brinda Minister di Husticia, Arthur Dowers, e oportunidad pa informa parlamento y pueblo di Aruba riba e proyectonan cu actualmente ta den marcha pa mehora e situacion na KIA.
“Nos mester trata KIA cu e seriedad cu e merece. No ta solamente un edificio, sino un institucion cu tin un impacto directo riba siguridad publico, riba bienestar di e personal y riba e proceso di rehabilitacion di personanan deteni”, Arends-Reyes a expresa.
Durante e reunion a sali na cla cu gobierno ta atendiendo varios aspecto prioritario. Entre nan ta e pedido di un scanner nobo, cu segun Minister Dowers ta haci caba y ta na caminda. Tambe gobierno ta trahando riba fortalecemento di siguridad tanto interno como externo, modernisacion di infrastructura y mehoracion di condicionnan laboral pa e personal di KIA.
Arends-Reyes a pone enfasis riba e dedicacion di e trahadonan di KIA, kende diariamente ta ehecuta un tarea compleho y delicado.
“Nan merece respaldo, proteccion y reconocemento. Ta profesionalnan cu diariamente ta contribui na siguridad di nos comunidad y, p’esey, nan mester por conta cu condicionnan di trabou digno y adecua,” e parlamentario a declara.
Un otro punto importante cu a trata durante e reunion tabata e necesidad di un KIA nobo. Segun informacion comparti pa Minister Dowers, ta existi un plan di financiamento cu ta sigui wordo desaroya pa haci posibel e construccion di un facilidad moderno. E inversion total ta calcula na mas di 200 miyon florin.
Arends-Reyes a expresa cu Aruba no por sigui depende di solucionnan temporal, sino cu mester traha cu un vision di largo plaso. El a indica cu ta importante pa gobierno garantisa e fondo y e planificacion necesario pa por inicia e prome fase di e proyecto, cu ta representa un inversion inicial di aproximadamente 18 miyon florin.
Segun Arends-Reyes, un instituto coreccional moderno mester bay mas leu di detencion so. E mester crea espacio pa resocialisacion, educacion, guia psicologico y preparacion pa reintegracion den sociedad, contribuyendo asina na un sistema di husticia cu no solamente castiga, pero tambe crea oportunidad pa rehabilitacion y, finalmente, un Aruba mas sigur.
Na conclusion di su intervencion, Jennifer Arends-Reyes a haci un yamada pa trata e futuro di KIA cu responsabilidad, planificacion y cooperacion, evitando decisionnan ad hoc of politisacion superficial di un asunto di tanto importancia.
“Siguridad na KIA ta directamente conecta cu siguridad di nos comunidad. Como parlamento, nos tin e responsabilidad pa sigui eherce control, sigui haci pregunta y sigui insisti riba solucionnan concreto cu beneficia tanto e personal como nos pais henter”, Arends-Reyes a conclui.
