Tech Shack, 24ora.com y Sinterklaas a uni den un campaña via Facebook pa regala un mucha entre 5 pa 12 aña di edad, bishitando un scol basico, un bais como regalo. E campaña di mas o menos un luna a resulta den un exito rotundo. E homber santo a anuncia e gran ganado awe, den persona di Jayzion Hazel. E lo ricibi su bais regalo diaranson awor dia 5 di december, precisamente riba dia di hacimento di aña di Sinterklaas.
Headlines Group, cas editorial di 24ora.com ta masha contento cu e campaña. Siendo e pagina local cu mas siguido riba Facebook, 24ora.com tin no menos cu 64.349 siguido, mientras cu mensualmente mas o menos 200 mil diferente usuario ta subi nos website.
Pa e campaña specifico aki, e promocion a alcansa mas di 27 mil usuario, di cual 2707 diferente usuario a participa dor di “Like, Share & Comment” riba e promocion. Via un sistema computarisa, e man inocente di Sinterklaas a laga scoge un solo ganado.
Tommy Pietersz di Tech Shack a bisa awe di ta contento cu e campaña pasobra a nota cu Sinterklaas a scoge hopi bicicleta y auto di remote control e aña aki como regalo pa e muchanan bon mucha. Tech Shack como tal a percura pa un stock adicional pa garantisa cu tur mucha ta haya un regalo cu ta laga nan move, manera ta un bicicleta. Diaranson awor riba Pakjes Avond lo tin presencia di Sinterklaas atrobe pa entrega regalo na tur e bon muchanan.
