E hoben Jairo Lesire mester duna cuenta den corte pa un caso penal di intento di asesinato, contra dje. E kier a huy awe pa Hulanda. Jairo Lesire a kere cu e por a burla sin mas di husticia despues di tira otro hoben de cachete.
E suceso a sosode na un club nocturno conoci den Tanki Leendert. E caso tabata scondi pasobra na prome instante autoridad no tabata sa. Hospital tampoco a notifica autoridad. Nan ta bisa cu ta secreto medico.
Mientrastanto e victima a drumi den cuido intensivo. Finalmente autoridad a haya sa cu ta Jairo Lesire a los e tiro. E tabata scondi na San Nicolas na cas di su tata, segun fuentenan. Djey un hende a cumpra un ticket pa e bandona Aruba pa sconde na Hulanda.
Jairo Lesire a kere cu na Aruba cos ta bay facil. Ora el a yega aeropuerto, el a check-in bay aden, pasa Migracion, cu mesora a activa autoridad cu el a pasa.
Recherche a presenta na aeropuerto y a acerc’e bis’e cu ta aki mes e mester keda pa duna cuenta di su acto. E ta acusa of ta bou sospecho di intento di asesinato.
E hoben cu a haya e tiro a drumi algun dia den cuido intensivo y djey a bay drumi riba piso na hospital. Su bida no ta den peliger mas pa e tiro cu el a haya den cachete durante su presencia den e club nocturno. Awor autoridad ta investigando pa purba haya e arma uza den e tiramento.
