Inspeccion di Salud Aruba (IVA) a ricibi varios pregunta di ciudadanonan preocupa pa motibo di e noticia di e recall cu a tuma luga mundialmente di remedinan cu ta contene e stof Valsartan. E remedinan aki ta wordo prescribi pa individuonan cu ta sufri di presion halto y cu problemanan di curason. Den e caso aki, e remedinan Valsartan produci na un fabrica specifico na China a wordo saca for di mercado.
Esaki ta pa motibo cu nan ta contamina cu e substancia N-nitrosodimethylamine (NDMA) cu posiblemente por aumenta e probabilidad pa haya cancer. Sinembargo, cientificamente esaki no a wordo proba ainda riba e ser humano.
Na Aruba e remedi generico Valsartan ta obtenibel cu receta na botica. E fabrica cu ta distribui e remedi a avisa e importadonan di remedi na Aruba y IVA di e contaminacion y e riesgo. E importadonan a verifica cu un di e ‘batches’ contamina a wordo importa na Aruba y a tuma e accionnan necesario pa informa e boticanan debidamente. Ta trata di e marca Aurobindo cu number RVG 101567 di 160 mg. Desde 1 di juli 2018 e batch specifico aki no ta obtenibel mas na e boticanan na Aruba.
Inspectora di Remedi, drs. Roselynn Angela (Boticario) ta conseha esunnan cu ta uzando e remedi generico Valsartan pa no stop di bebe esaki y pa caba nan prescripcion. Si acaso bo tin duda y kier check e RVG nummer di bo remedi, por haya esaki riba e paki di remedi. Y si tin preocupacion of pregunta por acudi na bo dokter di cas of botica.
