Den cuadro di e reunionnan cu ta tumando luga entre Formado mr. Evelyn Wever-Croes y diferente stakeholders, awe a toca turno na Instituto Pedagogico Arubano (IPA). Ambos representante a duna di conoce cu e combersacion tabata uno hopi exitoso. Tambe IPA a trece padilanti cu ta imposibel pa sigui duna enseñansa ‘one size fits all’.
Marilyn Richardson, adjunct director di IPA a bisa cu nan a trece varios punto di atencion padilanti pa e siguiente gobernacion tene cuenta cu ne. A parti esakinan den e categorianan di wetgeving, e posicion di IPA, maneho di finansa, personeelsbeleid y tambe e desaroyo general di enseñanza na Aruba.
Na su turno, Marisol Croes, director di profesionalisacion di IPA, a splica cu nan a pone hopi enfasis riba e necesidadnan di e alumnonan na Aruba.
El a añadi cu si tuma nota di e noticianan actual, por ripara cu tin diferente tipo di problema na Aruba y tin diferente tipo di hende ta biba akinan cu ta papia diferente lenguahe y cu tin diferente cultura riba nos isla y cu asina ta imposibel pa sigui duna un enseñansa cu ta ‘one size fits all’. Pues esaki tabata e parti clave den e reunion, caminda a dialoga riba kico ta e cambionan cu mester haci den e sistema di enseñansa na Aruba.
Pa cobertura mas amplio, lesa e edicion di TREMPAN mañan.
