Den skina di Wilhelminastraat cu Ooststraat a bin un negoshi nobo, unda antes tabata B.A. Arends & Sons, conoci como Brenchi’s. Ultimo dianan por a mira hopi movecion na e luga aki, specialmente cu e edificio tabata practicamente den mal estado.
Sector priva ta haci inversionnan na momento menos cu ta spera. Ta haci inversion den momento di crisis, unda ta prepara p’e bon tempo cu ta bay yega. E edificio aki tin mas of menos 100 aña bieu y esunnan cu conoce historia lo bisa cu eynan tabata corta glas. Tabata corta glas, spiel, shuttles y tur esaki den e temporada di gloria di B.A. Arends & Sons.
Awo por mira un cambio total na e edificio aki. E informacion acumula ta papia di un inversion 100% di sector priva y no tin sosten di gobierno. Bisando esey, ta e sector priva ta invertiendo. E mesun hende cu a inverti den henter e area aki, den otro edificio y plasa, un biaha mas ta inverti den e edificio di ex Brenchi’s. Desde a cuminsa drecha e edificio aki, por mira e cambionan. Por mira con diferente e edificio ta kedando.
Informacionnan ricibi ta bisa cu e localidad aki ta bay bira tipo crioyo, esta e ta pa tanto local como turista. Ken lo maneha esaki, no por sa ainda. E luga aki ta bay bira un tipo di rumshop y restaurant. Asina ey esun cu kier yega eynan por pasa un rato agradabel. Sector priva ta haci e inversion aki den un momento cu hopi hende tin miedo di inverti y di kico por spera nan.
Den proximo dianan lo sigui busca mas informacion con tur cos lo desaroya cu e localidad aki, cual ta un inversion 100% priva. Tipo di inversionnan aki ta importante p’e pais.
