Un grupo grandi di invitadonan a presencia e presentacion di e ultimo buki di poesia di e escritor, poeta y ensayista Arubano Quito Nicolaas diaranzon 9 di oktober na Cas di Aruba.
E anochi a conta cu un programa sumamente interesante unda diferente orador a papia riba literatura en conexion cu e obranan di Quito Nicolaas. E escritor mes a repasa cu carera como escritor y a ilustra e diferencia den esaki. Loke a cuminsa cu poesianan na un edad di 12 aña a desaroyo su mes na publicacion di poesia, scirbimento di novela y columna.
Di e manera aki e publico presente por a cera conoci cu e diferente facetanan di e escritor Quito Nicolaas. Den su trayectoria te awor aki Quito a publica 13 buki di cual shete ta buki di poesia, tres novela, un buki di storia y un coleccion di columna. E publicacionnan tambe a capta atencion di e mundo literario pafor di Hulanda. Esaki a conduci cu poesianan di Quito a keda publica na diferente paisnan manera Argentina, Colombia, Estados Unidos y China.
Angelo Tromp a tene un discurso na unda ela papia over di Quito Nicolaas su papel como culturista y a ilustra esaki cu algun di su obranan. Joan Leslie a papia riba e fundacion Simia Literario y cu Quito Nicolaas tabata un di e iniciadornan di e fundacion aki pa promove literatura Caribense na Hulanda.
Durante un presentacion di imagennan di e Festival Internacional di Poesia di Medellin na juli di e aña aki, Quito Nicolaas a papia riba su participacion na e festival y tambe a declama dos poesia propio.
Por ultimo Wim Rutgers a haci un analisis di e poesia “Tijdspanne” for di e buki “Argus”. Despues di e charla di Rutgers Sr. Nicolaas a haci entrega di un ehemplar di su buki na Minister Plenipotenciario Guillfred Besaril. E mandatario despues di a ricibi e prome ehemplar a felicita Quito cu su buki y a bisa di – mirando e pasion di Quito pa cu literatura – ta curioso pa mira a proximo obra literario di Quito Nicolaas. Minister Besaril a gradici Quito pa su contribucion na e mundo literario y alabes cu su obranan ta forma parti di e herencia literario di Aruba.
