Street Painting workshops exitoso di Gustave Nouel na artistanan di tur nivel, cu National Institute of Arts (NIA) a organisa na Sint Maarten y un mural colectivo na Belair Beach Hotel, hunto cu algun workshop y un masterclass den bailamento cu Arlene Halley a duna na centro di arte Kunstcircuit na Deventer, tabata instrumental pa stimula e intercambio cultural ‘nobo’ na 2023. Esaki lo a cuminsa na 2020, si no tabatin Covid y lockdown.
Na april 2023 e prome intercambio cultural di diferente disciplina di arte entre kunstcentrum Kunstcircuit (www.kunstcircuit.nl) y NIA (www.nationalinstituteofarts.com) lo bira realidad. Si e proyecto piloto aki cu Sint Maarten ta un exito, intercambio cultural cu Aruba na 2024, lo ta un proximo soño pa realisa. Ya tin cierto palabracion y plan pa esaki.
Director di NIA na Sint Maarten, Arlene Halley, ta un bailarina internacional, cu a cuminsa baila na Aruba (caminda el a nace) y tambe tabatin su mes scol di baile na Venezuela, na Merca y na Sint Maarten, prome cu, hunto cu Clara Reyes, el a funda Centro di Arte NIA, na Philipsburg dies aña pasa. Ademas di baile riba nivel maximo, NIA ta stimula Arte Visual, Musica, y Teatro. Y tambe arte interdisciplinario y experimental, mescos cu na Kunstcircuit di Deventer. (www.kunstcircuit.nl) caminda Gustave Nouel ta duna workshops di pintamento.
Si e pilot intercambio aki ta un exito, tin plan concreto pa cuminsa cu un intercambio ‘grassroot’ similar den nos Reino na Aruba, Corsou y/o Bonaire, cuminsando na 2024 (tambe cu intercambionan entre e islanan)
