Recientemente, mi a combersa cu un dokter cu ta di pensamento cu, diferente cu Colombia, un pashent cu sali fo’i Dr. Horacio E. Oduber Hospital (HOH), no tin cu ricibi un map cu su historial medico. Segun e dokter, loke cu si por haci ta pa solicita e informacion medico despues. E storia a parce mi poco straño, asina ta cu mi a pensa cu tabata bale la pena pa haci un investigacion y comparti mi hallazgo cu boso. Despues di tur cos, semper ta bon pa ta na altura di bo derechonan. Esaki ta e rubrica semanal di abogado mr. Lincoln “Dello” Gomez den Trempan.
Historia medico
Articulo 7:454 di Codigo Civil (CC) ta establece cu un proveedor di atencion medico (por ehempel HOH) tin e obligacion di establece un registro tocante e tratamento di e pashent. Den e registro aki, e proveedor di cuido mester tin anotacion di e detayenan tocante e salud di e pashent y tur procedura cu a realisa cu ne. Ademas mester inclui tur e documentonan cu ta contente tur dato necesario pa brinda un atencion adecua. Articulo 7:456, seccion 1 di e CC, ta menciona cu e pashent tin dos derecho riba su informacion medico:
- Derecho pa tin acceso na su expediente medico
- Derecho pa obtene un copia di dje
Esaki ta nifica cu e informacion medico, considerando su propositonan, mester duna un vision integral di e test di e pashent y su resultadonan, su tratamento, incluyendo e motibonan pa cual a hib’e hospital y su tratamento. E registracion mester inclui anotacion tocante salud di e pashent, tur e proceduranan realisa y tur otro documentacion cu ta relevante y necesario pa brinda un atencion medico adecua. Pa loke mi a lesa, e informacion di e pashent mester duna un vision completo di e examen di e pashent, su tratamento, e motibonan di e tratamento y e resultadonan. Esaki ta corda mi e map (of CD) cu e pashentnan ta ricibi na Colombia na final di nan bishita. Na Merca, mi e experencia cu e pashentnan por tin acceso na e informacion aki a traves di un portal special. E ta conveni y ta promove transparencia. Sinembargo, parce cu e pashentnan di HOH mester haya e caminda prome pa despues solicita nan informacion medico.
Kico mester tin den e “file”?
Ki informacion mester tin den e map? Un “historia” medico por ehempel, inclui archivo ambulatorio di tur e specialistanan cu e patient a bishita. Esaki tambe por inclui informacion di ambulance, formulario di Eerste Hulp, carta di tur dokter, informacion di radiologia, X-rays, CT scans, MRI, informe di patologia, informe di operacion y anestesia y historial medico. Si ta necesario pa un atencion adecua, e informacion medico por tin otro dato manera resultado di test di laboratorio y carta di otro profesionalnan. E informacionnan di enfermeria tambe ta parti di e dato di e pashent. A pesar di tur esaki, mi ta sinti cu hospital tin duda pa revela e informacion aki. Ainda. Mi no por a haya detaye ni informacion di con pa haci esaki riba nan website www.arubahospital.com ni tampoco riba esun di Departamento di Salud Publico. Ta comprendibel, pero unicamente un parti, pasobra e pashentnan unicamente tin derecho di acceso. Puntra y kisas bo lo haya, pero si bo no hacie bo no lo haya nada.
Un idea?
Kisas un di e miembronan of fraccion di Parlamento di Aruba por (of mester) propone un amienda na e 7:456 CC di derecho di acceso y obtene un copia pa “e deber di informa” y duna un copia. Esaki ta nifica cu esnan cu ta brinda cuido medico tin e obligacion- te hasta sin cu nan pidi- pa manda e informacion medico di un manera electronico pa e pashent inmediatamente despues di su tratamento of mas pronto cu ta possible of duna esaki riba papel.
Mientrastanto, kisas e institucionnan manera HOH mester ta mas proactivo y informa di un manera extenso na su pashentnan tocante e derecho di tin acceso na su informacionnan medico, facilita y acelera e proceso di emision di un copia di su informacionnan medico. Esaki lo mehora e transparencia pa cu e atencion medico y lo ta na e interes di e pashent. Mester tene na cuenta cu un parti importante di e presupuesto nacional, a traves di AZV, ta destina pa asistencia medico. Mi no sa di boso, pero awe mi a siña algo nobo y mi ta feliz di por comparti esaki cu boso.
#BoAbogadoFaborito
