Aruba ta dal un paso importante den su transicion pa un sistema energetico mas sostenibel cu e introduccion di un sistema grandi di bateria pa almacena energia. E proyecto ta forma parti di e vision pa haci mas y miho uzo di e fuentenan natural di e isla, manera solo y biento, y na mesun tempo reduci e dependencia riba petroleo y otro combustibel.
Durante un entrevista, e ministro encarga cu WEB, drs. Rene Herde, a splica cu Aruba ta pasando pa un periodo di crecemento economico y di e poblacion, loke ta resulta den un aumento den e consumo di coriente. Pa responde na e demanda creciente, ta bira cada bes mas importante pa amplia e uzo di energia renovabel.
Un bateria di 35 megawatt
Un di e principal retonan di energia solar ta e almacenamento di energia. Pa enfrenta e reto aki, Aruba, hunto cu Wärtsilä, ta implementa un sistema di bateria cu un capacidad di 35 megawatt y e mix di e diferente tiponan di energia ta crea un red mas sigur y mas stabil.
E sistema lo permiti Aruba combina diferente fuente di energia, incluyendo energia solar, energia di biento, almacena den bateria y, ora ta necesario, combustibel convencional. Segun e ministro, e combinacion aki lo contribui na un sistema energetico mas stabiel, cu menos fluctuacion y cu mas siguridad pa e suministro.
E bateria lo tin un papel importante den e futuro energetico di Aruba, pasobra produccion di energia renovabel no ta constante. E cantidad di energia produci pa panelnan solar, por ehempel, ta cambia segun e condicionnan di solo, mientras cu energia di biento ta depende di e velocidad y disponibilidad di biento.
Un proyecto di escala grandi pa Aruba y Caribe
Alfredo Koolman, CEO di WEB Aruba, a splica cu e proyecto ta inclui no solamente e suministro di e bateria, sino tambe servicio di mantenemento. El a destaca cu e bateria ta representa un momento importante pa Aruba, pasobra ta trata di almacenahe di energia na un escala di utilidad publica.
Segun el a bisa, e tecnologia di e bateria a wordo desaroya recientemente y e sistema lo tin un capacidad considerablemente grandi. E proyecto ta ser presenta como e sistema di bateria di mayor escala den Caribe.
E meta ta mas grandi cu solamente instala un bateria. E almacenamento ta considera un elemento esencial pa Aruba por sigui aumenta su participacion di energia renovabel sin compromete e stabilidad di e red electrico.
Pa relato amplio lesa TREMPAN.
