Diferente patruya a mobilisa cu maximo urgencia direccion Rotonde Ponton riba Watty Vos Boulevard pa asina atende cu un accidente hopi serio. Algun meter mas ariba na banda panort di e caretera a bin topa cu e victima tira den yerba.
Accidente a tuma luga aproximadamente 4:30 pm ora cu a informa di un accidente sumamente serio, caminda un auto lo a dal un peaton y lag’e seriamente herida. Por a tuma nota di e windshield destrui door di e impacto, como tambe daño na e parti dilanti di e vehiculo.
Na stuur di un Kia Picanto blanco e chauffeur femenino pa un motibo desconoci te na e momento aki, a dal e peaton di tal forma cu el a bay cay na un distancia den e yerba banda di e caretera. Por a mira un band’i keds ainda tira riba Watty Vos Boulevard.
Na sitio, ambulance a presenta cu maximo urgencia pa trata e victima cu tabatin hopi golpi na pia, curpa y mas tanto na cabes. Tabata sangra masha hopi mes na cabes cual a pone cu a tarda un rato pa stabilis’e y asina por transport’e.
Tambe pasahero den e Kia tabata hopi altera y emocional mirando e seriedad di e accidente. Na stuur lo tabata trata di su mama, segun por a compronde y esaki a pone cu el a spanta masha hopi mes. A tuma nota tambe cu a pone e chauffeur supla pa asina descarta cualkier posibilidad cu e lo ta bou influencia.
E caminda tabata momentaneamente cera, pa asina tur personal na sitio por a traha trankil y atende cu e victima como tambe investigacion di locual a tuma luga.
