Tur aña dia 16 di October Food and Agriculture Organization (FAO) ta celebra Dia Mundial di
Alimentacion (World Food Day).
Mas di 150 pais ta celebra e dia aki cu diferente actividad y evenemento. Meta pa scohe un fecha mundial pa alimentacion ta pa pone atencion y yuda esnan cu ta sufri di hamber y tambe pa enfatisa e nesecidad pa siguridad di alimentacion y un alimentacion saludabel pa nos tur. E aña aki e tema ta: Cambia e futuro di migracion, inverti den seguridad di alimentacion y un mihor futur. E tema aki tin di haci cu e migracion di miles y miles di persona di un region pa otro y di un pais pa otro. Pa motibo di guera of insiguridad por ehempel hopi famia ta busca un mihor futuro na otro pais. Esaki ta trese cu ne diferente contratiempo y oportunidad riba diferente area y alimentacion sigur ta un di e areanan aki. Na Aruba kisas nos no ta wordo confronta manera otro paisnan cu migracion, pero si cu ta un hecho cu hopi di nos fruta y berdura ta wordo importa for di otro pais.
Esaki por ta un situacion hopi vulnerable pa nos na momento cu tin problema p.e. mal tempo, y no por yega Aruba. Aruba no tin impuesto riba berdura y fruta, toch e prijs ta mas halto door di e gastonan di transporte. Di otro banda tin diferente agricultor local cu ta planta y cosecha na Aruba. E beneficionan pa cumpra na agricultor local ta cu bo ta sostene e mercado local, ta haya producto crioyo, e productonan ta mas fresco, e tin beneficio pa medio ambiente y ta trece mas siguridad di alimento (fruta y berdura) na Aruba. IBiSA kier a enfatisa e beneficionan di planta bo mesun fruta, berdura y condiment fresco na cas. Algun beneficionan ta; spaar placa door di come loke bo ta coseha; come mas fruta y berdura cu ta beneficioso pa bo salud; bo ta mas activo y ta haci movecion na momento cu bo traha cu e matanan; baha ansiedad y stress, traha cu mata ta relaha bo curpa y mente. Riba Facebook di IBiSA tin receta di producto local y tin mas informacion tocante di e topico aki.
