“Oficialmente riba papel ta para oplichting”, asina abogado mr. Demis Illes a contesta riba nos pregunta di kico ta e acusacionnan contra su cliente, esta Jeandrick Oduber. E hoben a bin hay’e awor como sospechoso di husticia, envolvi den e caso cu a haya e nomber Flamingo, den cual su tata, ex-minister Otmar Oduber ta e sospechoso principal. A extende e encarcelacion di Jeandrick Oduber cu dos dia, despues lo bini bek pa sigui cu e proceso di interogacion.
Diahuebs atardi laat abogado mr. Demis Illes a presenta na oficina di Landsrecherche pa representa Jeandrick Oduber como su cliente. Illes sinembargo ta representa un otro sospechoso tambe den mesun caso. Illes tabata hopi corto den su contestacion.
Di otro banda 24ora.com a acerca ex-Minister Oduber, kenda ta e sospechoso principal den e caso Flamingo pa un prome reaccion. Oduber tabata habri pa combersa cu 24ora.com y a duna di conoce cu; su yiu ta un bon mucha y bon lanta.
Ora a puntra Oduber riba su combersacion cu abogado Illes, el a indica cu a inform’e cu “no tin nada”, e ta referi na acusacionnan contra su yiu homber. Den mesun rosea Illes a confirma na 24ora.com cu: “Oficialmente riba papel ta para oplichting.”
Apart di Otmar Oduber como tata, tabata presente tambe e mama y omo di Jeandrick Oduber na su salida cu boei na man for di Landsrecherche.
CASO FLAMINGO
Dia 24 di juni 2020, Landsrecherche (DLR) a haci varios huiszoeking en cooperacion cu RST (Recherche Samenwerkingsteam) y Cuerpo Policial Aruba y bao guia di hues-comisario. E huiszoekingnan aki tabata den cuadro di un investigacion penal di Landsrecherche tocante posibel delito di corupcion y otro hecho castigabel relaciona cu otorgamento di tereno di gobierno. E investigacion penal aki ta carga e nomber codico ‘Flamingo’.
Procurador General a duna Landsrecherche ordo na september 2019 pa cuminsa e investigacion aki relaciona cu informacion cu Ministerio Publico a ricibi di Cuerpo Policial di Aruba. Den e investigacion tin informacion tambe cu a wordo suministra na Ministerio Publico pa varios persona y organisacion. E investigacion ‘Flamingo’ ta dirigi primordialmente riba iregularidadnan den otorgamento di terenonan comercial di erfpacht den e periodo di 2017 pa 2019.
Mas concretamente bisa: e investigacion ta dirigi su mes riba e pregunta si un of mas compania a logra obtene incorectamente (un optie) riba terenonan di erfpacht den e periodo di november 2017 pa december 2019, caminda ta investiga tambe e eventual rol di ex-minister Otmar Oduber.
Den e huiszoekingnan a confisca documentonan y cargadornan di data. Di awor pa dilanti e team investigativo lo analisa e contenido di e administratie y e computernan cu a wordo tuma den beslag y lo scucha e sospechosonan y testigonan.
Inval den pasado
Por corda cu dia 24 di juni 2020, a tene inval na dos cas di ex-Minister Otmar Oduber, na Pavia y den Gold Coast.
