E luz den e sistema di migracion na aeropuerto a cende. A detene un pasahero cu a yega Aruba Tin un ordo di detencion di fiscal contra e homber aki. E ta relaciona cu denuncia haci pa cu abuso sexual. No por a saca afo ainda si ta abuso di menor of di un adulto. A avisa e polisnan trahando na aeropuerto. Esaki ta e polisnan di Grens Bewaking.
E sospechoso ta fam Jansen y tin 27 aña. E ta un prospecto di baseball. E tin un aña bibando na Merca. El a yega awe for di Merca pa asina celebra hacimento di aña di su yiu. E ruman muhe di su ex, a haci un keho di abuso sexual. E ex ta mama di su yiu cu ta bay haci dos aña. Famia no tabata sa cu tin denuncia haci contra Jansen. No ta conoci cuanto evidencia tin contra e sospechoso. Famia tabata cla pa ricibi Jansen for di Merca y awo a tende cu e ta deteni.
Nan a yega y mustra e sospechoso riba su derecho. A bis’e cu fiscal a duna un ordo di detencion y cu e no por sigui su biahe. Cu su documento di ordo di detencion den su man el a sali acompaña pa e polisnan di frontera na aeropuerto y tambe marechaussee cu ta staciona awo tambe na aeropuerto. E proceso di interogacion di parti di Jeugd en Zeden Politie ta bay cuminsa pa asina e splica of aclarea tur cos riba e denuncia cu tin contra dje.
Parce e ta un deportista tambe pasobra hasta glove cu bala e tabata tin den su poder durante e proceso di biahe.
