Den e discurso nacional prome minister Mark Rutte a confirma loke prensa Hulandes a publica mas trempan: pa cinco siman largo tur tienda no esencial ta cera y studiantenan mester sigui les online. E meta ta pa logra menos contacto posibel entre Hulandesnan.
“E mester sosode awo: mientras menos contacto, miho. Nos mester haci tur lo posibel pa baha e contagionan,” esaki prome minister Mark Rutte a bisa dialuna anochi di e medidanan extra tuma. Pero 2021 ta bira un aña di speransa.
“Nos mester pasa door di e appel zuur aki, prome cu bida mehora,” Rutte a dirigi su mes na e poblacion Hulandes durante un discurso via television for di Het Torentje, e oficina di e mandatario.
“E lo mehora. Lo yega un momento cu nos lo pone corona atras. Cu nos bida ta bira normal atrobe cu poco of ningun limitacion,” segun Rutte comentando riba e medidanan nobo y mas estricto di corona.
Solamente esey no por sosode awo, el a bisa di biaha su tras. “Cu e vacuna aña 2021 ta bira e aña di speransa di un luz na final di e tunnel.”
Si tur cos sigui cana bon, ta cuminsa vacuna den e siman di 4 di januari. Rutte a pidi e poblacion pa den e proximo luna “mustra un poco mas di pasenshi”.
“E ta zona simpel. Limita mas tanto posibel e contactonan. Pero mi sa cu e ta dificil.”
E lockdown parcial cu ta na vigor desde 14 di october, no por a evita cu e linea di contagio a sigui subi.
Rutte: “coronavirus ta plama rond mas lihe di loke nos a pensa siman pasa. P’esey ta cera Hulanda pa un periodo di por lo menos cinco siman. Hulanda ta cera su porta,” Rutte a bisa.
E medidanan cu ta cuminsa mey anochi:
– Scolnan ta cera te diaranson, 19 di januari. Ta papia di tanto scolnan basico como scolnan secundario. Crèchenan tambe mester cera nan portanan. E ta keda habri solamente pa esnan di profesion esencial.
– Tiendanan no esencial ta cera te cu e fecha ariba menciona, y ta conta tambe pa museonan, cine, teatro, zoologico y otro parke of centronan cu ta atrae masa di hende.
– Hotelnan por keda habri, pero no ta permiti pa nan sirbi cuminda. Si ta permiti take-away.
– Profesionnan di contacto manera pelukero mester stop. Fisioterapista y dentistanan si por sigui haci nan trabou.
– Scolnan deportivo mester cera nan porta atrobe. Ta permiti deportenan den aire liber y deportenan profesional tambe por sigui.
– Centronan di oracion ta keda habri
– Evita di ricibi bishita na cas mas tanto posibel. Maximalmente dos persona por ricibi. Solamente pa Pasco ta permiti tres bishita.
– No tin Toque de Queda.
