Gobierno di Reino Hulandes a presenta awe e “miljoennennota” na ocasion di apertura di Aña Parlamentario 2018-2018 den Parlamento di Hulanda. Riba e di 3 diamars di September, Su Mahestad Rey Willem Alexander ta duna un discurso den Parlamento den cual e ta resumi e plannan di Gobierno pa e aña nobo. Ta pronostica cu Gobierno lo haya 285 miljard Euro na entrada y 277 miljard Euro na gasto.
Ta pronostica otro crecemento economico otro aña mientras cu desempleo ta na su record di mas abou. Gobierno kier probecha pa haci algun cambio mesora den maneho y pa fiha un direccion nobo pa e pais.
Pa loke ta Reino Hulandes, e Rey a menciona cu lo sigui traha di cerca cu Aruba y Corsou den asuntonan mas concreto. Remarcablemente no a menciona St. Maarten mes den su discurso. Si a bisa cu na Aruba lo sostene esfuersonan pa atende retonan den nos hubentud.
Minister Plenipotenciario di Aruba, Guilfred Besaril a sinta hunto cu su coleganan di Corsou y St. Maarten net tras di Prome Minister di Hulanda. Esey ta e protocol di semper, siendo miembro di Conseho di Minister di Reino Hulandes.
