Secretario di Estado di Husticia y Siguridad ta na Aruba pa asina trata e topico di esclavo. El a tuma momento pa pidi disculpa den nomber di Hulanda. Prome minister di Aruba tambe a hiba palabra y a splica pakico e dia aki ta di importancia.
Prome minister di Hulanda, Mark Rutte, a habri e ceremonia na Hulanda y a hiba palabra riba e echo cu mester reconoce esclavo como crimen contra humanidad. E mandatario a califica e papel di Hulanda durante e pasado di sclavitud como doloroso y dañino. “Mi a pensa durante hopi tempo: e sclavitud ta un historia cu a keda atras. Pero mi a kiboca, siglo di opresion y explotacion ta sigui awendia nos mester enfrenta e pasado habri y honestamente.”
Rutte a tuma e tempo pa menciona diferente fecha den historia di sclavitud. Otro aña ta 150 desde cu sclavitud a yega su fin den e practica dje colonia antiguo Hulandes di Surnam. Den e ultimo añanan, a pone hopi atencion den historia di esclavo, unda por haya informacion den e archiefnan nacional. Awo cu ta pone mas atencion, e ta yuda cu cambio dje pensamentonan di cual ta algo bon.
E estado Hulandes, den henter su manifestacion di historia, ta responsabel p’e sufrimento teribel haci contra e personanan esclavo y nan descendiente. P’esey no por ignora e efectonan di pasado.
E rapport “Keten van verleden” dje Grupo di Dialogo di Historia di Esclavo ta hunga un rol importante den e proceso di crecemento di conscientisacion. Aña pasa a bin cu e rapport y den dje por haya hopi conclusion fuerte. Segun Rutte, awe nan a manda oficialmente nan contesta riba e rapport aki na Tweede Kamer.
Kier traha intensivamente cu e islanan pa trece e conocemento dje historia di sclavitud, trece conscientisacion y comprension. E proceso ey ta tuma tempo y por logr’e solamente hunto. Ta trahando p’e dia simbolico cu ta dia prome di juli 2023. Rey Willem-Alexander ta sinti su mes personalmente sumamente hopi involucra. P’esey dia Prome di juli e rey lo ta presente n’e conmemoracion y celebracion cu lo tuma luga na Amsterdam.
Eric van der Burg, Secretario di Estado di Husticia y Siguridad, a indica di ta gradici na esunnan cu pa aña a bringa pa resisti sclavitud. Van der Burg a indica cu e nos grandinan ta esunnan cu a sufri p’e pasado sclavitud. Sclavitud na Aruba tabata un poco menos intenso den comparacion cu otro pais. Tambe el a pidi su disculpa den nomber dje gobierno Hulandes.
Secretario di Estado a indica cu na Hulanda e proceso pa elimina sclavitud a dura hopi largo compara cu otro pais den Europa. Na Aruba semper tabatin un falta di interes den sclavitud y tabata notabel n’e celebracion di 50 aña. Gobierno Hulandes ta saca un man p’asina colabora hunto pa surpasa e retonan dje sclavitud. Ta contribui na e digitalisacion di Archivo Nacional pa mehora accesibilidad na e documentonan p’esunnan cu kier sa mas di esaki.
Prome Minister di Aruba, mr. Evelyn Wever-Croes, a splica cu awe ta un dia historico. Un dia cu hopi di antepasado a soña cu por bira realidad. Gobierno Hulandes a reconoce cu sclavitud tabata un crimen contra humanidad y a pidi su disculpa. Hulanda a indica di cana hunto cu Aruba y demas isla cu ta cay bou su reino pa asina yega na un proyecto di restaura, recupera y reconciliacion. A pesar di a sorprende gobierno cu e intencion aki dos luna pasa, a pesar di tabata kier ta envolvi mas den e proceso importante aki, Gobierno di Aruba ta considera e dia aki un paso historico.
Na final di e discursonan, Secretario di Estado a entrega tanto na Evelyn Wever-Croes como e vice-presidente di Parlamento di Aruba, Raymond Kamperveen, e reaccion formal dje gabinete.
Pa mas lesa TREMPAN.COM.
