Recientemente Horacio E. Oduber Hospital (HOH) tabata anfitrion di e di diestres Dutch-Antillean-South American (DAS) Clinic of Rheumatology and Internal Medicine na Aruba. Esaki tabata e prome biaha si cu e programa tabatin un duracion di tres dia yena di orador y informacion. E simposio aki a cuminsa na Surnam y despues a organis’e na Aruba como tambe na Corsou. E ta un evento cu anualmente ta tuma luga pa tur e dokternan di cas, specialista, praktijkondersteuners, nursenan specialisa pa asina mantene nan up-to-date. Y alabes mester menciona cu door di nan participacion nan ta haya acreditacion.
Durante e simposio aki tabatin diferente orador cu a toca diferente tema, entre otro fo’i Corsou, Sint Maarten, Surnam y tambe un variedad di orador fo’i Aruba mes. Cada dia tabatin un enfoke diferente manera malesa di nervio, di Musculo, malesanan reumatologico, tambe malesa di riñon, presion halto y mucho mas.
E di tres dia a bay riba deficiencia geriatrico (geriatrische afwijkingen). Durante e clinica aki tambe por a conta cu presencia di ciruhano plastico y e tipo di operacion cu ta haci na Aruba.
E specialistanan di HOH, esta dokter Waterloo, dokter Rodenburg y dokter Rellum hunto cu specialista Reumatologo van Vugt di Amsterdam UMC Hulanda a hinca ful e evento aki den otro. Fuera di e presencia di e participantenan, tabatin un cantidad grandi di interesado cu no por a asisti pero a sigui e clinica aki virtualmente.
Segun dokter Waterloo cu ta parti di e team di DAS Clinic, un bes mas e simposio tabata exitoso y hasta pa prome bes mester a cera registracion pa e di dos dia trempan, pasobra no por a acomoda mas hende den e sala, pues un dia “SOLD OUT.”
E evento “13th Dutch-Antillean-South American (DAS) Clinic of Rheumatology and Internal Medicine” un bes mas tabata exitoso. Ta gradici tur orador y parti di e team di organisacion pa e trabou duro pa por a logra haci esaki posibel. Danki na tur cu a asisti tambe cu a haci e simposio uno asina exitoso y fructifero.
