Aña escolar 2020-2021 a termina y esey kiermen e maestronan a bay di vakantie. Tradicionalmente riba e ultimo dia di aña escolar, esta na momento cu vakantie cuminsa p’e docentenan, tin e famoso actividad di Spula Krijt.
E storia di Spula Krijt a cuminsa pa motibo cu antes e maestronan tabata traha cu borchi, krijt y stof. Ora di termina algo, nan ta bay laba man. E nificacion ta indica cu nan a termina cu e tarea ey. E maestronan no por laba krijt, pero stofia nan curpa y a bin cu un concepto cu ta zona mas agradabel. Mas of menos 20 aña pasa maestronan di otro scolnan a cuminsa reuni manera cu bel a bati. Nan tabata reuni na Commandeurs pa pasa ratonan agradabel. Nan a reuni na diferente caminda, te ora cu esaki a bira popular. Den transcurso di aña a bin hopi mas hende cu no ta maestro. E concepto a keda, pero a bira completamente comercialisa.
Ayera na varios luga rond di Aruba, entre otro na Linearpark, On the Rocks y tambe Patio 15, Spula Krijt tabata all out unda por a mira presencia di tanto maestro como esunnan cu ta sostene trabou di maestro. E muchanan ta bay cu vakantie y e maestronan ta bay celebra cambio escolar.
Pa cobertura mas amplio, lesa e edicion di TREMPAN mañan.