Diabierna anochi pa mas of menos 8:00PM polis a presenta un biaha mas na e crusada dilanti S-Chow, Savaneta, pa un accidente. Na diferente ocasion sa pasa accidente na e crusada aki.
Un Toyota Celica color shinishi tabata bay direccion playa y tabata pasa varios auto na e momento ey. Pero na dado momento el a bin dal contra un Suzuki color oro pa despues bay dal den un Nissan Color Preto y Kia Rio color blauw scur.
Di biaha polis a presenta na e sitio pa tuma informacion di loke a sosode, pero tambe pa dirigi trafico.
Tambe a pidi asistencia di ambulance pa motibo cu e doño di e Suzuki a ricibi sla y tabata keha di dolornan. Polisnan a bay purba papia cu e chauffeur di e Toyota Celica, pero a ripara cu e homber tabata burachi. Di biaha a bay over na detene y transport’e pa warda.
