Diaranson pa mas of menos 11:00PM polis mester a presenta na un casino den area di low rise hotel pa atende cu un persona cu no tabata comporta su mes. Esnan den casino a splica cu e ser masculino a cuminsa bira fastioso y agresivo.
Na momento cu e homber a bira fastioso y agresivo, e personal di siguridad a acerc’e pa papia. E personal di siguridad a purba calma e homber y evita mas problema cu ne, pero e no tabata kier a coopera. Di biaha e trahadonan a opta pa yama polis p’e homber.
Na yegada di polis, esnan eynan a informa e agentenan policial kico tur a pasa. E testigonan a bisa cu e homber a bira asina agresivo cu el a hasta ataca un di e trahadonan di siguridad. Despues di a tende kico tur a pasa, polis a bay over na detene e homber. A hinc’e den auto policial pa transport’e warda, unda e tin di presenta dilanti subfiscal pa duna cuenta di su actonan. Polisnan a conseha e trahado di siguridad pa entrega un keho contra e homber pa su acto di agresion.
