Despues di e regresa dialuna for di Santiago de Chile unda e la competi den e Weganan Suramericano Hubenil 2017, e hoben tri-atleta Giannon Eights ya caba a mira accion na Aruba awor den e Sprint Triathlon organisa pa Aruba Triathlon Association.
Mester bisa cu Giannon a inicia cu e careda den bon forma unda e la sali como prome landado for di den awa pa despues hiba un bataya fuerte cu Anthony Wever den e di dos disciplina esta e bicicleta. Sinembargo na pia, Giannon tabata simplemente superior unda e ta drenta e careda cu casi 5 minut di ventaha riba e number dos. Remarcabel ta cu Giannon Eights a logra supera un record nobo den e Sprint Triathlon aki. Den luna di januari Giannon a registra un tempo di 1.09.10 den e Sprint Triathlon mientras awe e ta registra un tempo record di 1.05.47, cual ta casi 4 minut di diferencia. Den e categoria femenino a careda a ser gana pa Linda Smit mientras den Kid’s e hoben Christian y su ruman muher Rebecca Jansen a triunfa yegando na di prome lugar den mucha homber y muher. Meester bisa cu na final secretaria general di ATA, Sra.Glenda Croes-Tromp a bisa cu e federacion ta masha contento con e diferente competencianan a bay mirando cu nan a haya hopi cara nobo y cu nan atletanan ta prestando na e nivel desea sigur cu e atleta nan elite Renze Postma y e hoben prospecto Giannon Eights.
Mas cu claro tin hopi trabou ainda pa hasi pero poco poco nan ta logrando nan obhetivonan. E participacion cada bez ta grandi y cada dia e interes ta crece pa e deporte cual ta un bon senjal. Un danki sigur na Lotto, e Loteria di Aruba pa medio di Comision di Subsidio cu a yuda co- subsidia e competencia di Sprint Traithlon organisa pa Aruba Triathlon Association. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.
