Diadomingo, algo prome cu 2:00 pm polis a bay na un adres den Mons. Verrietstraat, na San Nicolas, pasobra algun hoben cu tabata frecuenta dilanti di e adres aki y tabata molester pa e habitantenan. Un di nan lo mester a pusha un di e habitantenan n’e adres, y pa colmo cu tabata na estado. Eynan cos a bay fo’i man, pasobra mas hende a cay aden.
Varios di e habitantenan, entre otro e pareha di e señora na estado, a yama mama di e hobennan, cu nan yiu ta haci fastioso dilanti port’i cas. Nan ta bin sinta den grupo y e doñonan di cas no kier.
Aki bisiñanan conoce otro y tambe conoce e mama di un di nan, kende a bisa e bisiñanan si e yiu ta haci fastioso, dal e un toks, hala su atencion y bis’e bay cas.
A bisa e hoben pa bay cas. A contesta e bisiñanan cu no tin nada di bis’e. Ey dado momento cos a bay fo’i man, te cu el a pusha e señora na estado.
Mama di e hoben aki tabat’ey na momento cu polis tabat’ey. Tambe a papia cu e hobennan pa no sinta dilanti cas di bisiñanan. Mester respeta su hogar y pa no bira un molester p’e area. Prome cu e bisiñanan actual, tabatin otro bisiña cu si tabata permiti e hobennan sinta dilanti di cas.
A conta polis di e situacion di e hobennan cu ta sinta dilanti cura, e hoben cu a pusha e señora na estado, a bin n’e sitio y topa cu su mama. A papia cu ne, te cu el a bira un discusion. Y pa motibo di menasa, polis a bay over na detene e hoben aki dilanti su mama, kende no a opone tampoco y a laga polis haci su trabao. Su deseo tabata pa aleha di e grupo en cuestion. “Cana cu e grupo ey, ta bay haya problema cu husticia,” ta loke e mama a yega di bisa su yiu, y manera tabata e caso cu a sosode diadomingo. Tabata un situacion fastioso. Señora na estado a keda di bay haci un denuncia y polis a bay cu e hoben warda, pa atende, present’e dilanti sub-fiscal y despues dicidi kico lo bay ta e siguiente paso pa su comportacion.
A papia cu e bisiñanan pa mustra riba nan comportacion y respeta tereno of propiedad dilanti cas di cada bisiña. Ningun hende no kier pa otro bisiña bin sinta na grupo dilanti cas. Ta spera cu a compronde y pa evita mas problema den futuro. Biba malo cu bisiña t’e cos di mas malo cu por tin.
