Tur miembro di Partido MEP a dicidi di haci un colecta y a yega na un suma riba 10 mil florin pa ta solidario cu pueblo. Nan a percura pa yuda crea 311 pakete pa por reparti na parokianan di Aruba pa yuda famianan den necesidad.
Parlamentario Hendrik Tevreden a bisa cu nan a scoge pa acerca parokianan den tur districto pa sigui mantene e regla cu tin. Tur esaki ta pa evita di tin hopi hende riba otro, evita di bay cas pa cas, y p’esey a scoge pa bay na e Parokianan. Cada hende den tur districto, p.e. Dakota, tin cu tuma contacto cu Parokia di e districto. Lo por yama y registra en caso cu tin necesidad di pakete. Parokia ta traha cu Fundacion Pa Nos Comunidad (FPNC) y tin un indicacion di Departamento di Asuntonan Social cua ta e famianan cu mas mester.
Segun Tevreden, nan kier evita mas cu por cu e ta bira un cos for di orde. Pa mantene e linea di orde nan a scoge e camindanan aki. Asina aki realmente e famianan den necesidad por bin na remarca, realmente famianan den necesidad por haya un pakete cu ta yuda nan den e temporada dificil aki. E ta gradicido na tur parokia, e boluntarionan, pa yuda famianan den necesidad haya paketenan di cuminda.
FNPC ta haciendo un tremendo trabou pasobra nan lista a subi cu casi 1000 hende extra pa haya paketenan di cuminda. Departamento di Asuntonan Social ta registra tur hende cu ta pasando den e momentonan mas dificil. Na e miembronan di e partido, segun Tevreden, e ta agradecido cu a saca di nan mesun saco e contribucion pa yuda esnan den necesidad.
