E Gobierno di Hapon a cualifica como “lamentabel” e presencia di bapornan Chines den su awanan teritorial di e islanan remoto Senkaku y a compromete pa defende “firmemente” su soberania.
E comentarionan ta sali dilanti di informenan cu ta duna cuenta cu for di diadomingo ultimo dos barco di Guardia Costa Chines ta den e awanan cerca di Senkaku, di cual soberania tambe Penking ta reclama, den e presencia mas prolonga desde cu tin registro.
“Ta lamentabel cu e situacion aki a prolonga durante mas di dos dia,” e minister vocero di e Gobierno Hapones, Katsunobu Kato, a afirma den su rueda di prensa diario, ora cu el a referi na e incidentenan nobo den e region aki.
E archipielago di e islanan Senkaku, den e lama di China Oriental y denomina Diaoyu pa China, ta bao di control Hapones, aunke China y Taiwan ta reclama nan soberania riba e zona.
Hapon ta sostene cu China y Taiwan a cuminsa na busca nan soberania riba Senkaku mas di mey siglo atras despues di e descubrimento di posibel reservanan di petroleo den lama di China Oriental.
Di acuerdo cu informenan di Guarda Costa Hapones, e entrada di e dos bapornan Chines a tuma luga diadomingo mainta ora cu nan a purba di acerca un boto di pesca Hapones cu tabata den e awanan aki y for di e dia ey nan ta eynan.
Bapornan Hapones ta acercando e zona pa exigi e salida di e barconan Chines, alabes pa proteha e piscadonan Hapones.
