Diahuebs 10 di October 2019, studiante di Organization, Governance and Management, Rousanne de Weever, a defende su thesis exitosamente y asina a obtene su titulo den Bachelor of Arts.
E comision di graduacion pa e defensa di e thesis aki tabata consisti di sr Edward Erasmus, MA (presidente di e panel), sra dr. Mieke de Droog (segundo evaluador) y sr Juan Marlon Kock, MSC, kende a fungi como tercer evaluador.
E thesis di Rousanne tabata titula: “The Economic and Commercial Impact of the Main Street’s Revitalization Program during the Years 2010-2018”. Rousanne a dedica un tempo largo y den forma extenso a haci un estudio riba e plan cu gobierno di Aruba a ehecuta durante e periodo 2010 – 2018 cu ta regarda e renovacion di caya grandi (mainstreet) y su impacto riba e desaroyo económico y empresarial den e área.
Cu e investigacion aki Rousanne kier a brinda un contribución na e pensamento cu plannan y programmanan di gobierno ta rekeri evaluación después di implementación y tambe cu ta prudente pa midi e éxito di e implementación a base di metanan cu gobierno a stipula na momento di prepara e plannan. Y mas importante ta pa siña (lessons learned) di locual cu a bai bon, pero tambe di aspectonan cu no a funciona manera a anticipa.
Rousanne a ehecuta e investigación riba su propio iniciativa cual a forma e basis pa su thesis. Rousanne a conduci un investigación qualitativo y a base di entrevista cu diferente stakeholders, e.o. comerciantenan, y representantenan di gobierno envolví cu e proyecto di caya grandi e por a colecta información valioso. Durante e presentación di e thesis Rousanne a presenta e resultadonan, pero tambe varios recomendación cu sigur ta importante pa considera.
En corto e resultadonan di e investigación ta indica cu e visión di e plan di gobierno no a alcanza su metanan económico, cual tabata pa crea un economía vibrante y diversifica den caya grandi. E investigación ta indica cu e cambionan físico (tangible) si a wordo logra, pero no a resulta den un adelanto pa comercio den e área. Tabata tin varios retrazo y durante e fase di ehecucion y no tabata tin un plan pa adapta na e cambionan cu a surgi y esaki a trese cu ne cu comerciantenan a perde confianza den e proyecto. Di otro banda e resultado ta indica tambe cu un gran cantidad di comerciante no a haci mucho esfuerzo pa adapta na e situación y pa haci uzo di ‘tools’ (e.o. technologia) cu por a juda nan pa aumenta nan actividadnan comercial. Locual cu a haci falta tambe ta e presencia di un Town Centre Management (TCM) cu lo mester tin e rol pa promove e área y bin cu iniciativanan pa aumenta actividadnan comercial. Universidad di Aruba, particularmente e departamento di ‘Organization, Governance, and Management’, ta felicita Rousanne cu e logro aki y ta desea e tur clase di exito pa su futuro carera. Pa mas informacion riba e estudio OGM, bishita e pagina di web di Universidad di Aruba na http://www.ua.aw/OGM y e pagina di Facebook cual ta https://www.facebook.com/pages/University-of-Aruba-OGM-Organization-Governance-Management-FAS/
