Diamars mainta e 17 bez campeon mundial di windsurf, Sarah Quita Offringa a bin duna un charla na EPB San Nicolas. E orguyo di Aruba su deporte a bin conta e alumnonan con e la inicia na e deporte di windsurf y logra su soñonan bira un realidad.
Por medio di un prestacion “powerpoint” e alumnonan a conoce e deporte y e diferente disciplinanan cu Sarah Quita ta eherce durante tur su competencianan bishita rond mundo. Mas cu claro e competencia y titulonan mundial no a bay sin su sacrificio di su mes y sigur di su famia cu semper a para tras di su exitonan. Saraha Quita a pone hopi enfasis riba e combinacion estudio y deporte cu ta bay hunto esaki sigur pa un bon desaroyo y formacion como persona. Si tur dos bay segun planificacion y metanan poni bo por yega hopi leu den bida.
Na final tur mucha a aplaudi e presentacion di Sarah Quita y haya e oportunidad pa haci pregunta na cual Sarah Quita a contesta tur. Tambe e alumno y docentenan a saca potret pa asina keda cu un bunita recuerdo. Director di EPB San Nicolas, Sr. Gregory Mathilda den presencia di Unit Manager di Startjaar, Sra. Esactherine Helder a otorga dos bunita obsekio na Sarah Quita Offringa como muestra di aprecio pa su bunita trabou desplega pa nos comunidad y fungi como un ehempel pa nos muchanan. SQ Offringa
