Desde tur e medidanan pa combati e Covid-19, a ripara cu e cantidad di casonan di problema social den pueblo ta aumentando. Practicamente tur dia polis ta haya nan mes ta intermedia den problema di famia, problema di pareha, problema di bisiña etc. etc. Diadomingo tampoco no a scapa di e tendencia aki.
Tabata den careda di 11’or y mey di mainta, cu varios persona a bati alarma na polis ora cu nan a mira con den e parkinglot di un banco na Santa Cruz, tin un Honda blanco y unda e homber tabata bati un muhe den e auto aki.
Mesora un patruya di Polis a bay pa e sitio menciona, pero na yegada e auto a bandona e parkinglot caba y a bay otro caminda den e drive-thru di un establicimento di fastfood. Aki e Polis a bay mesora nan tras y a papia cu ambos partido den e Honda blanco, cu ya caba tabata den e rij pa ordo nan cuminda.
A resulta cu den e caso aki, e muhe tabata esun cu tabata bati e homber y cu e homber mas bien tabata e victima di maltrato bou man di e muhe.
Sinembargo niun di dos no kier a entrega keho y e ora Polis despues di a papia bon cla cu nan, a dicidi di bay for di e sitio y laga nan mes soluciona nan problema.
