Ta despues di hopi aña Gobièrnu ta mustra ku protekshon di medio ambiente ta un di su prioridatnan. Sra. Zita jesus Leito ,e aktual Minister di Tráfiko, Transporte i Planifikashon Urbano, tempu ku e tabata Minister di Salú, Medio ambiente i Naturalesa den Gabinete Koeiman , a sòru pa deklará Klein Kòrsou teritorio protehá bou di Tratado di Ramsar.
Gobièrnu di Kòrsou pa medio di un dekreto a deklará Klein Kòrsou komo teritorio ku ta kai bou di e tratado di Ramsar. Esaki ta un tratado internashonal for di 2 di febrüari 1971 den kua paisnan ku a ratifiká e tratado a komprometé nan mes pa protehá e medio ambiente di e areanan akuátiko apuntá.
E preservashon di naturalesa konforme e tratado ariba menshoná no ta enserá ku lo tin ku stroba desaroyo ekonómiko pa motibu ku awendia e turista moderno ke disfrutá di e naturalesa den su forma original. Nan ta yama e tipo di turismo aki ekoturismo i na hopi parti di mundu e tipo di turismo aki ta atraé masha turista.
Frakshon di PAR den parlamento ta haña importante pa mustra riba e echo ku Gobièrnu mester traha riba un desaroyo balansá di Klein Kòrsou na unda di un banda ta tuma tur medida pa konservá i protehá e naturalesa i di otro banda krea kondishonnan pa ekoturismo krese na un manera responsabel.
Den kuadro di protekshon di naturalesa mester bin ku lei pa parkenan di naturalesa den kua ta salbaguardiá e flora i founa huntu riba tera komo bou di awa.
Pa protehá e naturalesa riba Klein Kòrsou por pensa riba e medidanan ku Boneiru a tuma pa ku Klein Bonaire. Aya na Boneiru no por pone niun edifisio òf algu paresido i pa bishita e isla mester registrá di antemano. Lo por pensa pa hasi esaki na Kòrsou tambe, lokual lo por resultá den un fuente adishonal di entrada pa Gobièrnu.
