Riba 15 di februari ultimo, tres miembro di parlamento a firma p’asina yama Minister Ursell Arends p’e bin duna cuenta di e situacion alarmante na SABA. Aquanette Gunn di MAS, drs. Mervin Wyatt-Ras di AVP y drs. Marisol Tromp di MAS hunto a firma, mirando cu segun e parlamentarionan; gobierno a presenta y ricibi aprobacion p’un presupuesto cu ta encarece di cortamento di fondo den SABA, sabiendo tur e consecuencianan cu lo trece cu nan. Tampoco ta un secreto, e echo cu tin un lista di spera sumamente largo na SABA.
Despues di tres luna exacto cu a pidi pa e reunion, presidente di parlamento, a otorga nan e reunion riba 15 di mei 2023. Durante un entrevista cu drs. Mervin Wyatt-Ras di AVP, el a duna di conoce cu; a yega na su conocemento cu tin un situacion di impasse entre directiva di SABA y Minister Ursell Arends, kende ta responsabel pa e cartera di cuido di nos grandinan. Berdad, durante e reunion, e minister a hasta menciona cu no tin confiansa mas pa sigui delibera y ta na mesa cu e directiva. E parlamentario di e fraccion berdeta lamenta e forma con Minister Arends ta hiba su maneho. Parce cu SABA tabata haya un subsidio for di gobierno di 22.5 miyon florin pa luna, pa cual di e suma ey; 18.5 miyon ta bay pa paga trahado so. Pero locual ta mas remarcabel aun, ta cu desde 2020, a sigui corta den e subsidio di SABA y actualmente ta ricibiendo menos sen for di gobierno. Pa e fraccion berde, e situacion aki ta uno alarmante. Tur cos a subi, costo di bida ta haltisimo, pues no na hustificabel pa sigui corta den SABA.
Ras a duna di conoce cu el a compronde for di SABA, cu si nan sigui ricibi e montante actual for di gobierno, nan lo tin cu manda algun pashent cas mirando cu nan no lo por cubri y nan gastonan pa luna. Claro cu esaki tin como consecuencia cu e lista di espera pa un adulto mayor ricibi un cama den SABA lo sigui crece, pues, mas aun di locual e ta actualmente. Por lo menos 75% di e pashentnan di SABA tin demensia y problemanan cronico, pues ta haci e presion riba e personal mas grandi. Di otro banda tin cu menciona si cu SABA tin specialista medico cu ta traha cu nan, pero e presion pa tin enfermo den cas ta subiendo. Casi SABA no ta un cas di cuido so mas, sino un cas di cuido pa percura pa nos grandinan. Gobierno di su banda ta sinti cu SABA mester tin como meta pa ta mas bien un asina yama “opvangcentrum.”
Opocision, a entrega un mocion pa por garantisa cu SABA ta ricibi e sen necesario y pa e personal tambe por ta contento na pia di trabou. Claro, pa ta claro kico ta e vision di SABA den henter e proceso aki.
