Solidaridad ta un palabra hopi uza ultimo simannan door di sindicato STA den cuadro di contribucion di nan miembronan den e fondo di FASE. Un fondo cu ta necesario mirando e cantidad di personanan cu a perde nan trabou. Incluso STA ta haya cu gobierno lo por haya hopi mas entrada via di un belasting di solidaridad.
E mandatario encarga cu Finanza Xiomara Maduro a reacciona hopi fuerte. Pasobra ta den negociacionnan pisa mester a tene cu Hulanda pa por haya e placa. “Si nos no a para pa tuma decision di biaha, awe lo ta diferente. Esaki ta algo cu ningun hende na e pais aki lo kier. Nos por hiba monton di discusion, pero ban wak ki bataya nos kier bringa.”
El a splica cu 60% di e forsa laboral caba ta haya ayudo y e otro ta biba di FASE. Si e 60% stop di existi na e momentonan aki, di unda ta bay saca e solidaridad. P’esey e ta keda ripiti bo kier ta solidario of no. E ta algo cu el a splica diferente sindicato caba for di aña pasa. “Ami lo no por a drumi trankil riba mi cama, si mi a laga tur hende haci loke cu nan tabata kier. Mi mester a wanta presion di esnan cu a bin pa zundrami pasobra no ta compronde pakico no a pone un Solidariteitsheffing. Mi a tuma e miho decision cu mester a wordo tuma pa e pais aki,” e mandatario a bisa cu su man poni na su curason.
Solidario ta un palabra grandi cu poco hende ta pone den practica, e mandatario a termina bisando.
Sindicato STA, cu ta representa e.o. trahadonan di ELMAR cu ta den un lucha riba e 12.6% cu gerencia kier kita for di nan salario.
