Den cuadro di e reunion publico cu a tuma luga diaranson den parlamento pa loke ta trata e compania di Serlimar, por a tuma nota di varios punto di bista riba esaki. Dialogo y discusion a tuma luga den dos tanda caminda cu e parlamentarionan a pasa ful e dia ta trata e topico aki. Riba esaki, minister Ursell Arends a bisa cu esaki no tabata un tarea facil mirando cu e situacion di Serlimar ta presenta un preocupacion. Arends a splica cu mal maneho y corupcion a conduci e compania caminda e ta awe.
Sinembargo, e minister a bisa cu el a tuma e oportunidad diaranson pa papia di e historia completo di e compania y con a yega na esaki y cu esaki sigur a trece suficiente claridad pa asina compronde pakico Serlimar ta n’e punto di bay bancarota. Pero si a enfatisa cu nan ta trahando duro pa rescata esaki y haci tur posibel pa garantisa cupo di trabou no tur trahado di Serlimar. Arends ta sigur cu dicho splicacion a señala riba e importancia cu tin pa traha di manera structural pa por logra paga e debenan habri cu e sector priva como tambe cu Land Aruba.
Locual Serlimar mes a propone ta pa paga e debe di shete miyon cu e sector priva den tres aña y esun di diestres miyon na Land Aruba den un periodo di ocho aña. Unabes realisa esakinan, por convence hues pa extende e surseance van betaling. Arends a bisa si cu e director interino y e raad van toezicht a traha duro pa asina e compania por t’ey awe ainda y pa e trahadonan tin nan trabou ainda. “Aworaki ta nos tarea como gobernante pa percura pa Serlimar por keda existi y nos lo haci nos maximo esfuerso pa garantisa esaki”.
