Dialuna 22 di april riba dia di ‘Mama Tera’, ministerio di Naturalesa a celebra Earth Day Forum 2024. Aña pasa a celebra esaki caminda a lansa concepto di ley pa reconoce derecho di nos naturalesa den nos constitucion. E aña aki a bini hunto pa toca e tema di ‘Climate Resilience’ den loke ta cambio climatico, caminda cu a lansa ‘National Climate Resilience Counsil’ cual lo bira e consulado pa lidera tema di cambio climatico riba nos isla. E ta consisti di varios departamento y tambe stakeholders di sector priva pa prepara e ‘climate roadmap’ of maneho riba con Aruba lo bay atende cu cambio climatico tanto pa termino corto y mediano.
Esaki segun minister Ursell Arends ta bay bira un di e prome tareanan cu e consulado aki ta bay atende su mes cu ne. Tambe gobierno a firma acuerdo cu instituto Mericano ‘Stimson’ cual ta un instituto di Washington cu pa algun decada ta enfoca pa atende den cambio climatico. “Pa Aruba specificamente nan ta bay conduci un ‘CORVI’ cual ta un ‘Climate and Ocean Risk Vunerability Index’ cual lo yuda na haya mas di 100 indicador y 3000 punto di data cu ta bay ta e enfoke special riba con lo prepara pa atende cu cambio climatico.”
Minister Geoffrey Wever tambe ta forma parti di e colaboracion akinan cu un total di diestres compania di sector priva cu hunto ta financia e estudio aki pa asina por tin e base riba con Aruba mester atende cu cambio climatico. Despues di esaki segun minister Arends ta splica cu lo tin otro framework cu lo conduci un Climate Atlas pa Aruba, y di esakinan lo crea sinergia cu otro pa asina duna guia pa prepara e maneho pa Aruba por atende cu cambio climatico.
Na e momentonan aki ya caba nos por sinti efectonan di cambio climatico. E estudio aki segun minister Arends lo dura entre 15 pa 18 luna prome cu haya resultado final. Stimson Institute ya caba tin expertisio den haci esaki pa otro pais y isla den Caribe. Aruba ta bira e prome pais unda nan lo agrega e parti di salubridad den aspecto di e estudio haciendo esaki uno unico.
Pa mas lesa TREMPAN.COM.
