Diamars mainta, EPB San Nicolas tabatin e honor di ricibi Gobernador di Aruba, S.E. Alfonso Boekhoudt pa un bishita di trabou. Director di EPB San Nicolas, señor.
Rensley Mathilda conhunto cu Presidente di Fundacion Educacion Profesional Basico (S.E.P.B.) sra. Josette Daal a ricibi Su Excelencia Alfonso Boekhoudt.Den e “docentenkamer” di scol a sigui cu un splicacion riba e vision di EPB y e vision y misio specifico di EPB San Nicolas. Tambe a duna splicacion riba e maneho di enseñansa digital y con e scol a soluciona e retonan den esaki.
Durante Gobernador su recorido riba e tereno di scol, dos alumno di e unidad technico a duna splicacion tocante e proyecto cu ta carga e nomber ‘The Solver’. Durante e pandemia, alumno y docentenan di e unidad Tecnico di EPB San Nicolas a inventa un watercooler conforme e reglanan di DVG encuanto seguridad y higiena. Como resultado tur alumno por bebe awa fresco haciendo uso di e ‘Solver’.
Tambe Gobernador por a mira con na EPB San Nicolas ta biba den union cu naturalesa y con ta cuida medio ambiente. Por ultimo EPB San Nicolas a haci entrega di un bunita obsekio den forma di un cas di cunuco na Gobernador, Boekhoudt.
