Tin un rumor persistente cu Glenbert Croes ta bay bira un minister. El a comenta cu ta depende na si e ta pasa e screening y ta depende si e ta haya apoyo di partido di MEP. Mester warda riba esey.
Ta un proceso mester pasa ainda, segun Croes. Te ainda e acuerdo completo mester bay conseho di partido pa su aprobacion. MEP ta un partido cu ta afera su mes, wanta su mes duro na e participacion democratico dentro di e partido. Ta duna lider di e partido como formador e espacio, mandato y confiansa pa bay forma cu e team negociador, e gobierno nobo.
Croes ta kere cu nan ta haciendo un gran labor, hunto cu MEP, POR, RED, di purba di yega na un acuerdo, relacion di coalicion di un Gobierno nobo solido, stabil, duradero y esey tin ora ta tuma tempo.
Soppi pura ta sali salo. Bo forma un Gobierno lihe, cu no ta basa riba e principionan solido cu tur hende por carga, e ora bo por haya problema na caminda. Ta miho dura un tiki mas, strika e diferencianan, fortifica loke ta uni nan den un pensamento comun cu ta refleha den tur tres programa di e tres partidonan, cu lo bira e programa di Gobierno. Loke ta diferencia nan, nan dicidi di atende nan na un forma cu mas tempo. Pero loke ta uni nan den e proyecto di gobierno aki, cu ta bay wordo refleha den e proyectonan cu ta wordo resalta den e programa di Gobierno, ta e punto di salida, pa trabao inmediato pa e gobierno nobo cu wordo forma.
Croes a expresa cu a yega na e punto, unda cu e Gobierno nobo mester wordo forma, den sentido cu e siman aki ta uno determinante y lo sa di e screening con el a bay den e proximo dianan. Obviamente hunto cu esey lo cay e acuerdo final entre tur tres partido, pa asina e bay conseho di partido di tur tres partido, pa nan aprobacion final pa e gobierno nobo por wordo forma.
Deseo di Glembert Croes
Tur hende sa den e ultimo cuater añanan, ki ta e temanan cu el a mishi cun’e. Ken a lucha pa scapa e refineria. Ken a lucha pa e trahadonan local den e refineria, cu no ta hayando atencion. Ken a lucha pa e contratistanan local haya trabao den refineria. Ken ta saliendo na defensa di e pueblo trahado. Pobresa. A bisa 12 mil cas den e campaña aki. Sa kico tin den tur e casnan? Necesidad, pobresa, dificultad. Mester un Gobierno cu ta bay duna pueblo atencion den su necesidad, den su dificultadnan di bida. Y esey ta tema, causanan cu ta yama Croes, cu ta lant’e tur mainta, como politico, pa e por ohala haci un diferencia den dje.
Pase loke pase, e bira minister, si e bay Parlamento of unda cu e bay, e kier pa pueblo sa cu nan lo tin den dje un luchado, un defensor, un amigo ruman cu lo no dobla rudia, dobla principio pa cumpli cu loke a priminti nos pueblo den campaña.
Promesa electoral, priminti ta debe, cu nos pueblo, ta loke nan debe pueblo pa cumpli cun’e. Croes kier ta un di nan cu lo por garantisa nos pueblo cu esey lo bay ta su papel. Garantisa cumplimento cu loke a wordo priminti den campaña. Nan ta un coalicion, pero nan ta un partido tambe cu nan programa cu mester percura pa e programa haya realce den loke ta bay bira e curason di e programa di e gobierno nobo.
