Diadomingo mainta un di tres asesinato a tuma luga. Y atrobe Minister di Husticia, Rocco Tjon, a keda keto?
Desde e momento cu Gobierno Wever-Croes a dicidi pa kita ‘overtime’ for di polis, ta parse cu Aruba a bira manera un Wild Wild West: Trafico insigur cu a resulta den mas accidente, algun grave cu a resulta den varios morto den trafico. Mientras e prome 3 luna di 2022, no tawata tin ningun. Y awor e di tres asesinato di cual e ultimo dos den apenas 5 dia. Den ningun di a casonan di accidente grave of asesinato Minister Rocco Tjon a bin dilanti como e mandatario encarga cu e asuntonan aki, pa mustra e solucion of vision cu e tin pa resolve e problemanan aki.
Den mi opinion un di e solucionnan ta sinta den prevencion. ‘Meer blauw op straat’. Mas polis visibel riba caminda. Mas polis trahando den bario. Mas polis den e area turistico, pa nos no haya cu gang ta kere cu nan ta manda na Aruba!
Pa e di tres aña consecutivo, no a cuminsa cu un klas nobo di scol di polis. E Gobierno ta economisa riba e siguridad di nos pais prome cu nan a keda cla pa yuda nos hendenan, cu lo ta sufri di stress, un causando grandi di problemanan mental. Y Minister Rocco Tjon no a bringa pa su portefeuille, pa e cuerpo policial por keda fuerte.
E no ta un maneho logico den mi opinion, pa baha e oranan di overtime di polis, mientras cu nos a caba di pasa door di un guera psicologico durante e crisis di Covid-19. Cu a resulta den un aumento drastico di asesinato na Aruba.
E efecto traumatico cu e asesinatonan tin riba pueblo en general, pero specialmente riba e generacion di hobennan cu ta bayendo scol secundario, cu ta bin su tras lo ta pio. Si bida ta sigui manera nada no a pasa, ta esey lo bira e ‘normal nobo’? Cu ora tin problema ta soluciona esaki cu pleitamento, tiramento, hincamento y bebe y core iresponsabel riba caya y causa accidente mortal den trafico?
Kico mas Minister Rocco Tjon ta warda pa sosode, prome cu e ta actua como e lider cu e mester ta pa nos comunidad? Despensami, pero Minister Rocco Tjon ta faya den tur area di su cartera, den mi opinion su maneho ta: ‘Too Little Too Late’ y ‘Achterste Voren’. Pone polis traha nan orarionan extra bek pa asina nos tin mas polis riba caya y nos comunidad por pasa e High Season di Pasco, Aña Nobo y Carnaval na un manera sigur, cu trafico sigur. Habri e klas di polis bek, pa nos hobennan por tin un perspectiva mas positivo y mas oportunidad di estudio y trabou paga.
Pa clausura, Gobierno Wever-Croes no mester bati riba su pecho cu el a spaar 63 miyon riba e presupuesto di 2023, si esaki ta costa 500% mas bida den aña 2022, cu Covid-19 a causa na 2020. Mester bin cu mas polis riba caya inmediatamente, un intervencion nacional pa soluciona conflicto na tur scol (klas 5 y 6) basico y secundario y den barionan. Pa evita cu mas problema lo surgi y yuda esunnan cu ta sinti of pensa cu nan no tin nada di perde haya speransa bek. Y kita e recorte di 7,6% cu ta causa mas pobresa y stress den comunidad. Si e Gobierno no por cumpli cu esaki, miho nan tur baha na awa, cu nos Minister di Husticia canando dilanti.
