Durante e rueda di prensa di FPNC di diabierna 15 di mei 2020 sra Gianaika van der Biezen, directora di FPNC a anuncia e lansamento di e website nobo como tambe e formulario di registracion online pa cliente.
E website www.fpnc.aw ta un pagina web cu tin informacionan general di e trabaonan di FPNC, su servicionan, miembronan di team FPNC, con pa bira boluntario y con pa haci donación como tambe kico ta e productonan desea como donación.
Alabes pa prome biaha den historia di FPNC a haci posibel pa clientenan por registra directamente online via e pagina web. FPNC a splica cu desde incio e la posiciona su mes na e di dos den luga den liña den ayudo structural den pobreza y semper a traha pa medio di instancianan amigo di FPNC.
E crisis aki a pone un preshon asina grandi riba tanto FPNC como e instancianan amigo cu pa logra yuda mas famia posible tabata necesario pa habri e registracion temporalmente pa clientenan por haci nan peticion directamente via e website.
No solamente cliente nan di FPNC pero tambe tur e instanciannan amigo di FPNC por referi nan cliente via e webiste aki cu un código especialmente pa e instancianan. Den caso cu un instancia na e momento aki no a ricibi su código por manda un email na [email protected] pa ricibi esaki.
Hopi importante pa cliente y/of instancia amigo di FPNC sa ta cu e formulario mester ta completo. Considerando cu peticion cu falta información ta exigi extra atención di e team esaki por tarda e proceso. Ademas FPNC tin un tarea di “match” e datonan pa evita cu famianan ta haya ayudo dobbel. Pa e motibo aki peticionnan por tuma 5-6 dia di trabao prome cu e cliente wordo yama pa busca su pakete. Den esaki e mensahe y apelación pa comunidad ta pa yuda bo famia/of amigo den necesidad, comparti cu otro mientras ayudo oficial ta yega. Esaki ta solidarismo y esaki ta balornan y forza den comunidad cu no mag di bay perdi y cu ningún instancia ni Gobierno mester pretende di kier reemplasa.
Tene na cuenta cu no solamente pa FPNC pero pa tur otro instancia e situación aki ta nobo, nunca visto y impactante pero sea conciente cu tur ta traha y haci nan máximo esfuerzo pa ayuda.
FPNC ta gradici orbitalnets pa su tremendo trabao pa cu e webiste y formulario di registracion online.
Sra van der Biezen a finalisa cu un ivitacion na henter comunidad pa visita e website y tambe sigi FPNC su pagina di Facebook i Instagram pa asina keda bon informa di tur e trabaonan di FPNC.
