Parlamento di Aruba a tene un reunion riba Rijkswet Aruba financieel toezicht (RAft), unda Minister Presidente mr. Evelyn Wever-Croes, Minister di Husticia y Asuntonan Social Rocco Tjon, Minister di Economia mr. Geoffrey Wever y Minister di Finansas mr. Xiomara Maduro tabata presente pa duna informacion.
Pueblo di Aruba tin e bon cla cu minister presidente no a gana solamente comunidad, pero a haci esey tambe na Hulanda. mr. Gerlien Croes, parlamentario independiente, a indica cu esey ta duidelijk pa tur hende. E retorica di awe un biaha mas tabata ken a haci kico, ken a hinca Aruba den debe, ken a hinca Aruba den mas debe. Realidad ta, cu awe ta para den un situacion unda a hunga politica cu e futuro di Aruba.
Na momento cu Aruba tabatin un Landsverordening Aruba tijdelijk financieel toezicht (LAft), Rocco Tjon y Ady Thijsen di MEP a bisa e tempo ey cu partido AVP a entrega autonomia di Aruba y ta deshaci di LAft. Pero, durante e reunion di awe minister presidente ta puntra su mes “con ta posibel cu Hulanda no ta duna un splicacion huridico.” Tambe e tabata puntra dicon Hulanda no ta duna un chens di bin cu e LAft bek. Esey ta bin pa motibo cu Hulanda no ta kere y no ta confia mas esunnan cu a maneha e pais den e ultimo añanan. Esey ta e simpel realidad, e parlamentario independiente a enfatisa.
No por bisa Hulanda cu nan a bari LAft di mesa pa hunga politica entre e partidonan, y awo kier bin cu e LAft bek. E parlamentario a indica cu si bin cu e LAft bek, loke Hulanda ta proponiendo ta un Rijkswet. Esey ta pone cu ta bin un discusion di autonomia, pero loke e autonomia a duna e pais ta un debe di seis biyon den 37 aña.
Di mira un politico sali bisa cu pueblo tin di pone su placa rindi, mester puntra si esey t’e tipo di autonomia cu kier. Croes kier sa unda ta rindi mas placa, pasobra e maneho hiba tin Aruba unda e ta awendia. E Rijkswet proponi, locual Hulanda ta bisa pa tuma e ley aki di cual nan ta duna un interes di 3.2%. Durante e reunion minister presidente a indica cu Hulanda por a duna e interes na dos porciento, pasobra Hulanda tambe kier rindi su placa cu Aruba. E echo ta cu si por spaar e trinta miyon florin pa aña y por negosha cu Hulanda. Di por haya e trinta miyon ey extra door di firma cu Hulanda. E trinta miyon ey extra por ta inverti den pueblo. Gobierno ta prefera di considera pa bay presta riba mercado internacional na un interes mas halto, y esun cu tin di bay paga p’e ta pueblo.
Pa mas lesa TREMPAN.COM.
