E siman aki Gobierno di Aruba ta den parlamento relaciona cu e tratamento di presupuesto di pais Aruba pa 2022. Un presupuesto cu e tres partidonan di oposicion sigur no ta di acuerdo cu ne.
Segun oposicion, esaki lo bira un presupuesto di medida, den cual un di e cortamentonan aki lo mester tuma luga den salubridad. Parlamentario di e fraccion di AVP, mr. Gerlien Croes, durante un entrevista cu nos coleganan di ENFOKE, a bisa cu ya caba Gobierno di Aruba a corta 40 miyon den salubridad, pero segun acuerdo cu Hulanda, esaki lo mester yega 60 miyon. Pregunta di dia ta keda: for di unda mas Gobierno lo kier corta, pa nan yega na e suma aki? Ya caba t’e mesun pueblo mester paga pa su remedinan ora cu nan bay busca esaki nan na botica.
E comerciantenan mes tabata masha cla, pregunta ta keda, con e pueblo ta bay carga e gastonan aki cu ta aumenta dia pa dia. Ta kico ta bay ta e impacto, si na final di dia, t’e pueblo ta paga tur e gastonan aki. Diaranson e prijs di gasolin lo bolbe subi, cual lo haci cu e prijs di tur cos lo sigui subi. Aruba ta birando impagabel. AVP ta manda señal cu ta basta! Gobierno ta tilda oposicion di bandona pia di trabou, siendo cu e fraccionnan tabata den nan oficina.
Pero locual cu oposicion, den e caso aki, AVP, no ta acepta ta e falta di respet y e manera totalitario, cu ni manda carta pa Gobernador, pa Presidente di Parlamento, cu no por trata e presupuesto aki asina, ta Presidente di Parlamento, mr. Edgard Vrolijk y Minister President, mr. Evelyne Wever-Croes, ta dicidi cu ta asina ta hacie, awel, ta asina e ta bay tambe. Tanten cu nan ta sigur cu nan tin e diesun votonan ey di nan banda, nan no ta worry cu nada.
Hopi biaha ta cuestion e echo cu, den nos 36 aña como Pais Autonomo den Reino, casi semper oposicion ta bandona sala na momento cu mester cuminsa tratamento di e presupuesto. No ta tur hende ta di acuerdo cu ne, tur ora. Pero tin un motibo su tras, segun Croes. Nan ta prefera di bin afo y no participa na un payasada, unda cu tur hende sa cu e presupuesto aki ta un presupuesto di medida, unda cu tur cos lo subi pa otro aña, 2023.
