Pa locual ta poder di compra, tin un preocupacion den comunidad pa locual ta e tema di gasolin unda cu mañan lo anuncia cu lo tin otro aumento di e tarifa. Minister di Asuntonan Economico Geoffrey Wever ta papia masha bunita di loke ta e tema di poder di compra pero aumento di gasolin – a pesar cu esaki ta algo mundial – tambe ta afecta nos poder di compra den un forma hopi negativo.
Segun minister Wever, esey ta keda un preocupacion berdad pero ta relata na desaroyonan internacional. Diesel si lo bay baha pero gasolin lo subi. “Ta desaroyonan internacional unda cu tanten ta keda dependiente di esey ta algo cu nos tin cu deal cu ne.”
E mandatario ta agrega cu nan ta pushando diferente proyecto y a bisa cu cualkier recompensa cu por duna den baha of reduci accijns, ta nifica cu bo tin cu corta otro caminda.
Dus no ta cuestion cu no kier haci esey pero si ta dicidi por ehempel na aloca fondonan pa reduci accijns of baha BBO riba gasolin, e ora bo sa cu otro caminda lo tin menos placa pa aloca den por ehempel asuntonan social of enseñansa, cu ta prioridadnan cu mester pone. “Dus e ta keda un situacion dificil.”
Riba e parti unda cu tabata traha riba un plan pa trata di importante gasolin di diferente calidad y lag’e den man di e consumidor pa scoge cual tipo di gasolin nan kier uza, di un calidad un poco mas abou, ta algo cu, segun minister Wever, te aworaki e recomendacionnan cu gobierno a haya for di RDA ta negativo den e direccion aki. Pa e motibo ey e plan a keda para.
Na diferente pais di mundo ta bende gasolin di mas cu un tipo di octane. Na Aruba sinembargo ta un solo tipo di gasolin ta yega y esey ta di un prijs halto.
