Sidney Charity Foundation a bira un realidad. E ta un fundacion lanta pa dedica atencion tanto na mucha como hendenan grandi. Den cuadro di esaki ta prepara un evento grandi pa recauda fondo.
E fundacion lo concentra principalmente riba e ramo deportivo pa muchanan. Carmichael Bikker, vocero di e fundacion, a splica cu ta bay traha tambe cu instancianan cu ta dedica na grandinan di Aruba.
Ainda ta traha pa pone toke final na e structura mientras cu na mesun momento ta planea proyecto pa muchanan y hopi mas. Naturalmente ta bay bini diferente evento pa recauda fondo, cu e ex pelotero di Grandes Ligas mes a papia riba dje.
E idea di e fundacion ta pa keda traha durante henter aña, y traha den cooperacion cu Centronan di Bario y asina yega na hopi mas mucha y mas leu cu solamente deporte. Tin hopi mucha kisas no ta gusta deporte, pero ta traha cu arte. Pronto lo bay tin mas informacion pa pueblo di Aruba.
SIDNEY PONSON
E fundacion, segun e ex pelotero di Grandes Ligas, tabata un soño di dje di hopi tempo caba. Nan prome proyecto grandi pa recauda fondo lo ta un wahoo tournament shootout den luna di december. E tabata algo prepara pa tuma luga aña pasa, pero pa motibo di COVID a cancela tur preparacion y a prefera want’e pa e aña’ki.
E evento lo tuma luga dia 4 di december. Boto chikito di 32 pia bay abou y boto grandi ta riba 33 pia. Naturalmente esun cu mas kilahe ta gana e prome premio. Tin un seccion di Grandslam y esun cu suerte por gana 25 mil florin. Tambe tin un seccion di Blue Marlin, unda cu esnan cu registra pa e seccion aki ta paga un suma extra cual ta bay pa un fundacion y esun cu bini cu e pisca mas grandi ta gana e pot.
E idea aki ta un forma di recauda fondo y e ta un hobby di e ex pelotero Ponson, kende a yega di participa den torneonan rond mundo. Hopi tempo no tin nada den e area aki y e ta un forma pa trece nan hunto atrobe y e lo por bira manera un dia familiar. Na final di dia ta sinta warda e piscadonan drenta cu nan catch of the day.
