Lamentablemente, ayera 26 di maart 2020, Fundacion Salud Mental Aruba (FSMA) Respaldo apesar di e medidanan di precaucion tuma contra COVID-19, ta confirma di tin un total di 2 cliente y 6 empleado di e Clinica di Respaldo (situa patras di hospital) afecta pa e Coronavirus.
Ademas di e 6 resultadonan positivo, ya Respaldo tabatin e confirmacion un par di dia atras cu lo tin 1 cliente y 1 empleado confirma cu a test positivo pa COVID-19 – Coronavirus. Conforme cu e protocol nacional y protocol interno di Respaldo a tuma medida pa ‘trace’ dibiaha tur colega y personanan cu tabatin contacto cu e dos personanan encuestion. Tur hende den contacto cu e dos personanan cu a test positivo a wordo evalua, a haci e test di COVID-19 y a wordo manda cas den cuarentena en espera di e resultadonan di e test aki.
Pues ayera diehubes 26 di maart Respaldo a haya e noticia cu den e grupo di perosonanan di contacto manda cas, tin resultadonan di test COVID-19 cu a sali positivo. Respaldo den consulta cu e ekipo nacional di Coronavirus, hunto cu e infecciologonan di hospital lo tuma e medidanan adicional pa preveni infeccionnan inecesario y lo monitoria e salud di esnan infecta cu e virus mas di serca. Mester menciona cu ningun di e personan afecta ta mustra sintoma grave.
Pa loke ta trata familiarnan y amigonan di e clientenan inclui den e grupo cu a test positivo, por semper tuma contacto pa haya mas informacion y haci nan preguntanan na tel: 527 4620.
Respaldo ta yuda mas cu 2500 habitante di Aruba cu ta sufri di problema y/of trastorno di Salud Mental pa aña. Respaldo ta conta un total di alrederdor di 200 cliente cu ta wordo hospitalisa/opgenomen den e Clinica di Respaldo (antes PAAZ) pa aña. E clientenan aki ya pa hopi añanan caba ta bibando den Clinica, Mirando nan situacion pa cu nan salud mental nan no por biba sin asistencia profesional den nan andar diario. Ta trata aki di personanan cu no ta solamente sufri di un trastorno mental pero cu mayoria bes tin dificultad medico di salud fisico tambe.
Debi cu Respaldo ta cuida e grupo vulnerable aki asina hopi, ya desde inicio di e anuncio di COVID-19 Pandemia, Respaldo a bin ta prepara pa posibel infeccion cu lo por bay tuma lugar. Pues e organisacion a ehecuta un plan di protocol pa reduci e riesgo pa contaminacion adecua rapido. Despues di e prome casonan nacional infecta cu e COVOD-19, ta imposibel evita y controla contacto cu personan cu lo tin e virus aki cu 100% certesa. Pues e medidanan y protocol na Respaldo Clinica a drenta na vigor manera cu e prome resultado positivo a wordo anuncia na Aruba.
E medidanan aki a wordo comparti y cordina cu tur otro organisacionnan concerni importante na Aruba, Gobierno di Aruba, Departamento di Inspeccion y AZV.
Den practica esaki a conduci pa Respaldo tuma e siguene medidanan desde 16 di maart 2020:
- A stipula entrada y salida apart cu obligatoriamente mester wordo desinfecta regularmente
- A sera e departamentonan di dagbehandeling y dagbesteding
- A stop di ricibi bishita na Clinica Respaldo
- A bay over na mas consulta telefonico y menos consulta personal
- A prepara espacionan special di isolacion
- Hospitalisacion/Opname den Clinica solamente den casonan di emergencia
- A reduci e cantidad di personal riba diadomingo
- A cancela tur actividad den grupo
- Coleganan cu a biaha den e temporada aki a bay den cuarentene
obligatorio prome cu nan wordo institui bek na trabou.
Respaldo a purba pa ubica clientanan den clinica bek na cas cu famia, pero lastimanete esaki no por tabata posibel mirando cu nan ta ricibi tratamento intensivo y ta rekeri su debido supervicion.
Apesar di e medidanan tuma, a bin discrubi un colega cu a test positivo dia 24 di maart y un cliente riba dia 25 di maart 2020. Dibiaha e team di Respaldo a actua pa tuma precaucion, y test tur esnan cu a bin den contacto cu e dos personanan aki. Sala di isolacion a wordo poni den uso pa e clientenan hospitalisa/opgenomen den Clinica.
Pa loke ta trata e cliente di clinica cu a test positivo a opta pa a wordo hospitalisa debi na su salud general cu ta tabata uno debil caba.
Desafortunadamente di e coleganan y clientenan cu a wordo poni den cuarentena y haci e test, a resulta di tin 1 cliente y 5 colega cu a test positivo pa COVID-19.
Mas cu claro a cosidera pa tuma medidanan drastico despues di e prome 2 resultadonan positivo, pero mirando e gran necesidad pa atencion psikiatrico na Aruba, cu ta aumenta den momentonan di stress y cisis, esaki no tabata un opcion realistico cu ta cuadra cu e norma y balornan di FSMA Respaldo.
Cu e realida aki nos dialnti, Repaldo ta haye importante pa tin balanse pa por sigui brinda bon atencion na esnan cu mas mester di dje y na mes momento haci tur cos posibel pa evita cualkier infection di COVID-19.
Pues pa realisa esaki a crea medidanan adicional:
- A amplia e area di isolacion den e edificio; unda e empleadonan tabata traha y unda e clientanan a bay den cuarentene; pues dependiendo e risico-analyse lo por amplia esaki pa ful e edificio.
- Tur colega y cliente cu tabata den clinica durante e periodo di contaminacion lo wordo evalua y lo bay den cuarentena en espera di e resultado di e test di COVID-19.
- Tumando na cuenta e perdida imediato di mas cu un personal cu ta e motor cardinal den clinica, lo bay traha conhuntamente cu partners di Gobierno y na Hulanda pa por haya sosten di profesionalnan adicional pa por asisti den e temporada aki. Pues lo mester wak den ki forma lo por trece e coleganan aki Aruba obstante cu nos espacio aero ta sera, mas cu claro lo tuma medida di precaucion di cuerentena prome cu nan cuminsa traha na clinica.
Ta haci un apelacion na tur miembro familiar di clientenan registra na Respaldo of cu ta bibando den e Clinica cu ta preocupa pa nan sernan keri, pa comunica cu e departamento conserni libremente pa haci nan pregunta of pa haya mas informacion di nan ser keri.
COVID-19 – Coronavirus ta afectando mundo hente, y lastimamente e personanan mas vulnerable den nos sociedad ta esnan cu mas liher ta wordo afecta. Apesar di e perdida di varios colega, Respaldo kier asegura cu e lo sigui brinda e apoya na tur cu mester di dje, pero Resplado no por haci esaki su so. Nos mester cada un cuidadano di Pais Aruba contribui tambe pa yuda combati e virus aki.
Pa mas informacion of pregunta por semper yama Respaldo na e number general t: 2815000 of bishita nos website www.respaldo.aw / Facebookpage.
