Aruba ta conta cu un fundacion cu ta cla pa brinda yudansa na tur cu tin mester di un dak temporal. Esaki ta posibel por medio di un instancia social manera Sociale Zaken. E fundacion recientemente a logra finalisa un proyecto cu nan tabata bezig cu ne pa algun aña caba. E directiva a tuma over ex-Cas pa Hubentud y a cambia su metanan y convertie den un fundacion cu ta brinda refugio.
Un di nan meta principal ta pa brinda asistencia cu un dak temporal den un situacion di emergencia. A renoba e edificio por completo den un proyecto hunto cu CEDE Aruba y Hulanda. Hulanda na final di dia t’esun cu a financia e proyecto, pa cual cu ta trata di un suma di mas o menos 800 mil florin. Debi cu fondo di Hulanda no por bay directo pa un stichting of fundacion, CEDE Aruba t’esun encarga cu aproba proyecto prome cu Madre Patria manda fondo.
Den un periodo di cuater luna a logra renoba e edificio por completo, cu na final tin capacidad pa diesseis cama. Rene Ridderstaat ta presidente di e fundacion, durante un entrevista cu 24ora.com el a conta cu e fundacion ta brinda e servicio asina yama “Bed, bad en brood” (BBB). E parti sosten social y guia tin cu pasa via un instancia social prome cu yega na porta di Fundacion Refugio Social. E instancia cu interna e persona den e fundacion tin un costo cu e tin cu cubri. Un di e reglanan importante di e fundacion ta e parti di estadia, e persona no por keda pa un periodo largo cerca nan. Tin un fecha di comienso y final, ta calcula pa un periodo di maximo 30 dia.
Fundacion Refugio Social tin bon cooperacion cu diferente instancia social cu lo ta esunnan cu ta manda e personanan pa keda temporalmente n’e fundacion. Ta calcula cu e costo pa dia ta varia entre 80 pa 85 florin pa dia. Den futuro ta premira cu lo tin posibilidad pa huur e cushina cu esunnan ta interesa pa duna presentacion y of charla.
