Den e “Landenpakket”, pakete di medida, cu Hulanda a manda pa Aruba, tin lo siguiente formula como meta pa loke ta medida relaciona cu enseñansa:
- Realisacion di un calidad basico di enseñansa
- Realisacion di un bon acoplacion entre enseñansa y mercado laboral
- Realisacion di un bon fluho entre e sistemanan di enseñansa (na Hulanda Europeo of no)
Ta un berguensa, cu ta Hulanda mester pone meta pa renobacion di nos enseñansa, mientras nos tin documento cla caba pa ehecuta e mesun metanan aki y mucho mas. Nos ta referi aki na e documentonan Scol Arubiano Multilingual (SAM) di mei 2018 y e Plan Educacion Nacional 2030 (PEN 2030) di maart 2019, tur dos di Departamento di Enseñansa Aruba (DEA). Nan ta obtenibel riba website www.ea.aw.
Y mester enfatisa, cu Aruba tin su propio expertonan.
SAM ta trata specificamente di un tipo di enseñansa cu ta promove desaroyo di nos muchanan, teniendo cuenta cu nan idioma materno, nan cultura, nan ambiente di bida, pa nan por tin un miho desaroyo intelectual-cognitivo, social, civico, elemento necesario pa ta exitoso den e bida aki. E tipo di enseñansa aki a pasa su tempo di prueba caba cu hopi exito na dos scol piloto.
PEN ta trata den forma extenso e elementonan importante di un reforma di nos enseñansa, mientras e ‘landenpakket” ta menciona djis algun di e elementonan aki, den dos tres frase. Ta bon pa gobierno di Aruba mustra Conseho di Ministro di Reino riba e dos
documentonan aki y tambe riba tur e otro documentonan y estudionan recien relaciona cu nos enseñansa y su innovacion.
Ta lastima cu den e ultimo añanan a dedica asina hopi tempo y energia balioso na actividad no esencial, en bes di a cuminsa mesora cu ehecucion di e rekisitonan pa innovacion, perdiendo lamentablemente e confiansa di gremio educacional cu semper tabata boga pa innovacion na fabor di nos muchanan y nos pueblo. Shonnan, Aruba su propio plannan ta cla pa ehecuta!
