Dia 29 di April 2020, Parlamento di Aruba, den cuadro di e ‘crisis di Corona’ a tuma un desicion importante, reduciendo entrada di Parlamentario cu 25%. Ademas Gobierno a para biahe, entre otro pa Parlatino. Tur esey ta bon noticia, aunke e prome desicion en principio ta conta solamente te cu december 2020. Sinembargo, pa diferente motibo, mester trata aki di un ‘coreccion’ definitivo.
Codicioso
Dia 14 di juli 1997, nos Parlamentarionan unanimamente a aproba e ley cu nan mes a concipia den hopi pura pa mehora nan posicion financiero-huridico excesivamente. Entre otro casi a redobla nan salario mientras cu por a cobra un penshun completo cu 50 aña despues di apenas tres termino como Parlamentario. A regla esaki den nochi scur, scondi for di comunidad di Aruba y contra consehonan di literalmente tur (!) instancia di conseho y control manera Servicio Central di Accountant, Direccion di Personal y Organisacion, Controlaria General, Conseho di Consulta, Directie Wetgeving y Banco Central.
Durante hopi tempo a neglisha completamente e protestanan feroz di comunidad y e critica fuerte pa cu e biahenan di placer costoso y completamente inutil pa reunion di Parlatino. Ta te aña 2014, tempo cu a aumenta edad di penshun pa empleado publico, a aumenta esun di Parlamentario tambe pa 65 aña. Pero te ainda Parlamentario por logra acumula un penshun completo den apenas 12 aña!
E practica Parlamentario
Durante e añanan cu a sigui, mehoracion di e posicion financiero-huridico inhusto y den cierto sentido hasta ilegal di Parlamentario no a conduci na ‘trabou productivo’. Al contrario, (mayoria di) Parlamento a sigui aproba ciegamente practicamente tur cos cu Gobierno tawata dicta. Merecidamente a haya e apodo di Stempelparlement. Riba dje a neglisha nan tarea di control casi completo. E tantisimo biahenan aparentemente tawata un motibo importante pa e frecuencia limita di reunion. Por ta pesey Aruba te ainda ta e unico pais den Reino sin ley di financiamento di partido politico, ombudsman, credito pa consumido y medio ambiente. Di e tareanan cu Constitucion ta prescribi pa Parlamento, ningun a keda (adecuadamente) concretisa. Pesey Parlamente sin mas ta co-responsabel pa e desaster financiero di Aruba y pues pa e hecho cu Aruba a drenta e crisis di Corona como un pashent den coma den cuido intensivo.
Perspectiva
Sin duda e colapso di economia di Aruba tin consecuencia pa termino largo. E gran cantidad di desempleado den nos principal mercado di turismo, esta Merca, ya caba ta monta na mas di 30 miyon. Esey a/lo baha e nivel di prosperidad considerablemente. Economia di Merca lo cay den un resecion serio cu posibilidad pa un depresion. Bou di e circumstancianan aki un pronto recuperasion di economia di Aruba ta improbabel.
Pa sobrebibi, Aruba tin mester di hopi ayudo financiero (y probablemente pa tempo hopi largo). Pa motibo di e peso di debe cu ta hopi halto caba, un apelacion riba mercado di capital internacional ta practicamente inalcansabel. En realidad lo resulta cu solamente Hulanda por of ’kier’ duna e ayudo necesario. Gran parti di e ayudo aki posiblemente lo ta prestamo cu lo aumenta a monton di debe enormemente. Cancelacion di e debe aki, ademas di pago di interes, pa e decadanan benidero lo forma un peso insuperabel pa Aruba. Pesey ta inevitabel cu Aruba lo mester sigui economisa. Tur esaki ta haci inaceptabel pa nos Parlamentarionan recupera nan entrada y posicion huridico inhusto riba termino corto y hasta mediano.
Coreccion general
Durante e ultimo decadanan y entre otro pa motibo politico-partidista, a afecta e sistema salarial di gobierno negativamente, no solamente pa politico, pero tambe pa otro parti di sector publico. Specialmente a haci hopi (mal ) uzo di e fenomeno di ‘toelage’. Pero a pesar di ripiticion frecuente di advertencia y recomendacion, nunca a implementa coreccion. E ultimo intento di Direccion di Personal y Organisacion pa un reforma necesario di e ‘areglo di salario di Aruba’ ta data di 2006. Manera custumber, ‘politica’ a neglisha esaki tambe y a laga e asunto pa su cuenta.
E crisis actual ta rekeri adaptacion di ‘practicamente tur cos’ ta un oportunidad perfecto pa implementa aki tambe coreccion substancial y duradero! Ta di spera cu Parlamento lo uza e 18 lunanan benidero di estadia obligatorio na Aruba na un manera eficiente y efectivo pa recobra of coregi e atraso- y fayonan di e ultimo 34 añanan. Asina, danki na e crisis di Corona, pa di prome biaha posiblemente lo por dispone di un Parlamento cu lo produci di berdad a cambio di e placa valioso cu comunidad di Aruba ta pone disponibel pa nan!
