Si bo tin webo pa transporta, bo mester tin galiña pa pone nan. Y e galiña ta e terenonan. Por ta e tereno di e companianan di cobamento di santo ta bashi caba, no por coba mas of ta haya material malisimo, e ora nan ta cuminsa na tereno di bisiña, cual ta domeingrond. E no tin fin, segun notario Rodriguez-Taekema, kende ta consehero di Fundacion Conserva Area Cristal.
Si e inspectornan bay paden y mira e trabao cu ta wordo haci, nan lo por wak. Te ora cu solo baha of bira scur, por nota mashinnan grandi ta core pa prepara material pa e siguiente dia. Nan no por core cu santo si ta un direccion so. Si no ta hiba y busca bek, ta algo otro. Nan tin un deposito. Nan ta coba material for di e area eynan, el a menciona.
Esfuerso
E fundacion lo bay keda insisti te ora tin un solucion pa e problema aki. Nan tey pa conserva e area Cristal y nan no ta permiti ningun hende pa daña e area cu ta indica como un area di naturalesa. Asina ta prefera pa e keda. Tin espacionan mas limita. Tin parke Arikok y ta spera pa forma parti di e parke pa por salba e naturalesa y por duna un area di recreacion pa nos hendenan y tambe esnan cu ta biba na Playa of hasta den area di hotel, pasobra eynan no tin nada berde natural mas. Ta sinti e diferencia caba ora cu tabata tiki keto na April/Mei, cu hopi mas paharito a bin, hopi mas zonido di bestia. Esey ta riparabel. Tin algun prikichi y gonzalito cu ta traha neishi den cura y esey no tabata e caso algun luna pasa. A kere cu tabata den bon caminda, pero e situacion actual ta hopi desapuntante.
Segun Rodriguez-Taekema a splica adicionalmente cu tabata tin un kortgeding riba voorlopige voorzieningen y e tabata algo den pura. E vergunning no tin decision riba dje, ni rechasa, aunke e periodo ta nifica cu e ta un efectieve afwijzing, pero e no ta un toewijzing, te awor cu sa. Esey ta nifica cu no por haci bezwaar contra di un toewijzing. Ni un bodemprocedure tin efecto ainda pasobra no a tuma un decision contractual.
Riba e veredicto di huez, ta prohibi e companianan pa sigui. A ripara como habitante tin e respet pa nos hueznan. Sinembargo por mira cu e companianan aki no tin respet pa loke huez a dicta. Nos sistema na Aruba ta di tal forma cu corte no tin un aparato pa actua manera polis, of otro. E procedura cu tin di compronde ta, cu e habitantenan perhudica, nan tin cu bay busca cen, nan tin cu saca cen y lanta un caso, pa mustra huez cu loke el a dicidi no ta conta pa e hendenan aki, pasobra nan no ta respeta e decision di huez. Nan no ta duna balor na nos sistema hudicial. Esey ta e punto unda cu ta preocupante, cu den un pais cu tin un decision di huez, y esun cu ta wordo perhudica tin cu bolbe bay hinca su curpa den gasto pa e por enforsa locual cu huez a dicidi caba.
Esey tabata un di e preguntanan tambe, segun Rodriguez-Taekema. Tin di compronde cu ministernan no kier tuma e decision pa evita cu tin casonan contra gobierno. Awor ta status quo y e habitantenan si ta obliga pa cuminsa algo. Ta purba pa comparti e gastonan di t-shirt pa por cubri e gastonan.
Por papia di tereno priva, pero tin un rapport ta indica cu e hendenan aki a bay pafo di nan tereno. Ta di supone cu ora cu un habitante tin un tereno y e bisiña bin kibra e tereno pa por haci ganashi, por exigi daño y perhuicio. Esey ta punto cu e habitantenan ta splica cu si e personanan aki ta perhudicando y distruyendo tereno di e pais di nos tur, e ora un caminda mester tin un areglo unda cu e parti ey por wordo reclama y compensa.
Tin un tereno industrial y tin cu respeta esey. Un otro punto cu a wordo treci padilanti ta cu nos tur tin cu respeta regla y si tin regla ta bisa cu mester permiso, tin cu respeta e regla ey. No por ta asina cu uno ta respeta y otro hende no ta respeta. Tin un comunidad, tur ora ta papia di calidad. Nos pais por subi di calidad si nos tur ta respeta regla. Si no ta respeta regla, e ta bira un free for all.
