Diadomingo awor 8 di juli pa 9’or di anochi Fundacion CINEARUBA ta presenta ‘E bola di fuego’ live riba e pagina di Facebook di CINEARUBA.
E obra di radio aki lo wordo produci live den un studio y simultaneamente e publico na cas lo por scucha e obra mientras e actornan ta duna bida na e personahenan y e storia. Esaki ta un proyecto multi-disciplinario cu ta combina teatro cu radio of pa ta mas exacto actuacion auditivo.
‘E bola di fuego’ ta un storia crioyo di añanan sesenta, unda cu dos amiga lo hiba e publico den un aventura yena di comedia y suspense. E obra auditivo aki a wordo skirbi pa e cineasta local Juan Francisco Pardo. E ta conta cu un grupo di actornan cu lo duna bida na cada personahe, kende nan ta; Melisa Richardson, Teo Lopez, Natasha Richardson, Aldrich Marchena y Milly Koolman.
E parti auditivo ta consisti di diferente elementonan cu ta principalmente e voz, pero tambe tur e efecto sonoronan y e musicanan. Efectonan cu lo wordo realisa en bibo durante e presentacion di e obra. Tambe e obra lo consisti di musicanan di antaño y musica cu lo wordo canta en bibo durante e anochi di diadomingo. E ekipo humano cu lo percura pa tanto e efectonan sonoro y e musica, ta den man di Adelaida Fingal, Danny Martinez, Ginelly Quandt, Rodrigo Peraza, Roy Howel y Rotsena Pietersz. Direccion general ta bao di encargo di Adriano Fernandes cu lo percura cu tur cos ta sincronisa segun e tempo, storia y ritmo.
Esaki ta fundacion CINEARUBA su prome proyecto di obra auditivo mirando cu CINEARUBA te cu awor a enfoca riba cine. CINEARUBA semper ta interesa pa explora y experimenta diferente posibilidadnan di conta storia, envolviendo participacion di comunidad. CINEARUBA ta gradici Ateliers ’89, VNO y Fonds voor Cultuurparticipatie pa haci e proyecto aki posibel. E pagina web pa e presentacion diadomingo awor di ‘E bola di fuego’ ta www.facebook.com/cinearuba.
