Diabierna atardi Fundacion Venezolanos Unidos en Aruba a tene un reunion tocante deber y e derecho di un persona na momento cu e tin asilo politico riba nos isla. Varios persona a asisti pa asina por ricibi e informacion necesario.
Marllory Medina, ta e presidente di e fundacion, el a conta cu hopi hende a presenta pa asina ricibi informacion tocante nan derecho aki na Aruba. Nan a papia tocante varios topico pero esun principal tabata esun di e derecho y deber di un persona na momento cu e tin asilo politico aki na Aruba. Tabatin varios experto presente pa brinda informacion, manera por ehempel tocante derecho internacional.
Medina ta di pensamento cu ainda mester hopi informacion, pasobra ta duna e hendenan papel di asilo pero nan no sa nan deber a base di e papel aki. Pa loke ta trata e permisonan, tambe ta necesario pa duna mas informacion.
Minister Glenbert no a logra yega na e anochi di informacion pero su representante Jonathan Velasco tabata tey.
